نەتەوەیەکگرتووەکان: هێرشی ئەمریکا بۆ سەر قاچاخچیانی ماددە هۆشبەرەکان ڕێگەپێدراو نییە

ئاڤا نیوز

بەهۆی هێرشی سوپای ئەمریکا بۆ سەر قاچاخچیانی ماددە هۆشبەرەکان، نەتەوەیەکگرتووەکان هاتە سەر خەت و داوا دەکەن هێرشەکان ڕابگیرێن.

وێنە گەورەکە: بە بیانووی ڕێگریکردن لە بەقاچاخبردنی ماددە هۆشبەرەکان وەزارەتی جەنگی ئەمریکا بە فەرمانی دۆناڵد ترەمپ، سەرۆکی ئەو وڵاتە باندەکانی بازرگانیکردن بە ماددە هۆشبەرەکان لە دەریای کاریبی و ڕۆژهەڵاتی زەریای هێمن دەکەنە ئامانج.

لێدوانی فەرمی: راڤینا شەمداسانی وتەبێژی ئۆفیسی مافەکانی مرۆڤی نەتەوەیەکگرتووەکان ڕایگەیاند، ئەو هێرشانەی ئەمریکا دەیکاتە سەر بەلەمەکان قبووڵ نەکراوە و پێویستە ئەو وڵاتە هێرشەکانی بوەستێنێت و هەموو ڕێوشوێنێکی پێویست بگرێتەبەر بۆ ڕێگریکردن لە کوشتنی خەڵک، ئەو هێرشانە یاسا نێودەوڵەتییەکانی مافی مرۆڤ پێشێل دەکەن.

ئەوەی پێویستە بیزانیت: لە سەرەتای مانگی نۆوە ئەمریکا ئۆپەراسیۆنەکانی دژی ئەو باندانە دەستپێکردووە کە بەوتەی ئەوان بە قاچاخ ماددەی هۆشبەر بۆ ئەمریکا دەگوازنەوە، تا ئێستا ئەمریکا 14 ئۆپەراسیۆنی ئاسمانی ئەنجامداوە و بەهۆیەوە 61 کەس کوژراون.

بەتەنیشت ئەم بابەتەوە: ڕۆژنامەی وۆڵ ستریت جۆرناڵی ئەمریکی ئاشکرایکردووە، ئەمریکا پلانی داناوە لە چەند ڕۆژی داهاتوودا لە ناو خاکی ڤەنزوێلا هێرش بکاتە سەر ئەو بنکە سەربازییانەی لەلایەن باندەکانی بە قاچاخبردنی ماددە هۆشبەرەکانەوە بەکاردەهێنرێن.