کیێڤ داوا لە یەکێتیی ئەوروپا دەکات باجی گومرگی لەسەر کاڵا ڕووسییەکان زیاد بکات

ئاڤا نیوز

کیێڤ داوای لە یەکێتیی ئەوروپا کرد باجی گومرگی لەسەر ئەو کاڵا ڕووسییانە زیاد بکات کە هێشتا نەکەوتوونەتە ژێر سزاکانیان، کە لە سەرەتای دەستپێکردنی لەشکرکێشی ڕووسیا بۆ سەر ئۆکرانیا سەپێنراون.

لێدوانی فەرمی: ئەندری سیبیگا، وەزیری دەرەوەی ئۆکرانیا ڕایگەیاند، لەگەڵ ئەوروپا کاردەکەین لەسەر ئەوەی سزا بەسەر ئەو بەرهەمانەی ڕووسیا بسەپێنین کە ئێستا بەدەرن لە سزاکان.

ئەمەش بزانە: پێشتر یەکێتیی ئەوروپا باجی گومرگی لەسەر هەندێک کاڵای ڕووسی، بەتایبەتی بەرهەمە کشتوکاڵییەکان و پەین، لە چوارچێوەی پاکێجی سزاکانی سەر ڕووسیا لەدوای لەشکرکێشییەکەی ساڵی 2022 زیاد کردبوو.

ئەوەی پێویستە بیزانیت: بەپێی داتا فەرمییەکانی ئەوروپا، لە چارەکی یەکەمی 2022 پێش دەستپێکردنی لەشکرکێشییەکە، یەکێتیی ئەوروپا هاوردەکردنی کاڵای ڕووسیی لە 62.7 ملیار یۆرۆ، بۆ 6.98 ملیار یۆرۆ لە چارەکی دووەمی 2025 دابەزاندووە، واتا هاوردەکردن بە ڕێژەی 89% کەمیکردبوو.