لە سووریا 64 كەس بەهۆی تەقینەوەی مین و پاشماوەكانی جەنگ لە مانگێكدا کوژراون یاخود برینداربوون

ئاڤا نیوز

لە سووریا، لە ماوەی مانگێكدا زیاتر لە 60 هاووڵاتیی سڤیل بەهۆی تەقینەوەی مین و پاشماوەكانی جەنگ كوژراون یاخود برینداربوون.

چیرۆكی سەرەكی: ڕوانگەی سووری بۆ مافەكانی مرۆڤ، ڕاپۆرتی قوربانییانی مانگی تشرینی یەكەمی لە سووریا بڵاوكردەوە كە بەهۆی مین و تەقەمەنی نەتەقیو و پاشماوەكانی جەنگەوە، گیانیان لەدەستداوە یاخود بریندار بوون.

ڕاگەیێنراوی فەرمی: بەپێی ڕاپۆرتەكە، 13 هاووڵاتی لە ناوچە جیاوازەكانی سووریا گیانیان لەدەستداوە و 51 كەسی دیكەش برینداربوون كە بەشێكی زۆریان منداڵن.

ئەوەی پێویستە بكرێت: ڕوانگەی سووری لە ڕاپۆرتەكەیدا، جەخت لەسەر پاككردنەوەی ناوچە جیا جیاكانی سووریا دەكاتەوە لە پاشماوەكانی جەنگی چەندین ساڵە و گرژیی و ئاڵۆزییەكانی دوای 8ـی دیسێمبەری ساڵی ڕابردوو، لەڕێگەی لابردنی مین و تەقەمەنیی نەتەقیو و هۆشیاركردنەوەی خەڵكی لە مەترسییەكان.

وردەكاریی قوربانییەكان: لە ناوچەكانی ژێر دەسەڵاتی حكومەتی دیمەشق، 12 هاووڵاتیی سڤیل كوژراون كە چواریان منداڵن، 47 كەسی دیكەش برینداربوون كە 19ـەیان منداڵن. هاوكات لەناوچەكانی ژێر دەسەڵاتی سوپای نیشتمانی، منداڵێك گیانی لەدەستداوە و دووانی دیكەش برینداربوونە، هەروەها لە ناوچەكانی ژێر حوكمڕانیی ئیدارەی خۆسەر لە ڕۆژئاوای كوردستان، دوو منداڵ بەهۆی تەقینەوەی مین، بریندار بوونە.