مەکتەبی سیاسیی پارتی لەبارەی پرسی سەرۆککۆمار کۆدەبێتەوە

ئاڤا نیوز

 

سەرچاوەیەک لە مەکتەبی سیاسیی پارتی دیموکراتی کوردستان بە ئاڤا میدیای ڕاگەیاند، ڕۆژی شەممەی داهاتوو مەکتەبی سیاسیی پارتی بە سەرپەرشتیی سەرۆک بارزانی و ئامادەبوونی جێگرانی سەرۆک کۆدەبێتەوە.

 

زانیاریی بەدەستهاتوو: بەگوێرەی زانیارییەکانی ئاڤا، لە کۆبوونەوەکەدا، پرسی پۆستی سەرۆککۆماری عێراق و کاندیدی کورد بۆ ئەو پۆستە تاوتوێ دەکرێت، لە هەمان کاتیشدا، پرۆسەی هەڵبژاردنی دەستەی سەرۆکایەتیی پەرلەمانی عێراق لە چەند ڕۆژی ڕابردوودا باس دەکرێت، هەروەها پرسی پێکهێنانی حکومەتی نوێی هەرێمی کوردستان، حکومەتی نوێی عێراق، دۆخی عێراق و ناوچەکە بەگشتی تاوتوی دەکرێن. 

 

لەلایەکی دیکە: یەکێتیی نیشتیمانیی کوردستان لەبارەی پرسی پۆستی سەرۆككۆمار ئامادەکاریی کردووە، دوێنێ ئاڤا وەک یەکەم میدیا بڵاویکردەوە، سێ کەسی لەڕێگای ئەمیندارییەتی پەرلەمانەوە فۆڕمی خۆکاندیدکردنیان وەرگرتووە و ئەوانیش؛ نوێنەریی نزار ئامێدی وەک کاندیدی یەکێتی، نوێنەریی لەتیف ڕەشید، سەرۆککۆماری ئێستای عێراق و ئاسۆ فەرەیدوون، پارێزگاری پێشووی سلێمانییە.