خاچی سوور سێ تەرمی دیکەی بارمتەکان بۆ ئیسرائیل دەگوازێتەوە

ئاڤا نیوز

لە درێژەی جێبەجێکردنی بنەماکانی قۆناغی یەکەمی ڕێککەوتننامەی غەززە، خاچی سوور ڕایدەگەیێنێت، تەرمی سێ بارمتەی دیکەی گواستووەتەوە بۆ ئیسرائیل.

 

لێدوانی فەرمی؛ ڕێکخراوی نێودەوڵەتیی خاچی سوور ڕاگەیاند، تەرمی سێ بارمتەی دیکەی گەڕاندەوە بۆ بەرپرسانی ئیسرائیل، پاشان بە ئامانجی پشکنین ڕەوانەی پزیشكی داد دەکرێن.

 

زانیاریی زیاتر؛ ئێستا ڕوون نییە کە حەماس کەی تەرمی ئەو 11 بارمتەی کە ماونەتەوە دەگەڕێنێتەوە، یان دەستی بە چەند تەرمی دیکە دەگات، ئەمەش لە کاتێکدایە، ئیسرائیل حەماسی بە چەندین پێشێلکردنی ڕێککەوتنی ئاگربەست تۆمەتبار کردووە کە لە 10ـی ئۆکتۆبەرەوە کەوتووەتە بواری جێبەجێکردنەوە. هاوکات تەلئەڤیڤ دەشڵێت، "حەماس شوێنی تەرمەکان دەزانێت".

 

بۆچی گرنگە: دەستپێکردنی دانوستانەکانی قۆناغی دووەمی ئاگربەست بەستراونەتەوە بە ڕادەستکردنەوە تەرمی هەموو بارمتەکان بە ئیسرائیل. حەماس لەسەر ئەم پرسە دەڵێت، "پرۆسەکە قورسە و پێویستی بە کات هەیە".