فازڵ میرانی بۆ دەنگدەران: بۆ ڕاستكردنەوەی ڕێڕەوی حكومڕانیی عێراق ببنە هاوبەشمان

ئاڤا نیوز

 

فازڵ میرانی، پەیامێك ئاراستەی هاونیشتمانیان دەکات و داوایان لێدەكات بۆ "ڕاستكردنەوەی ڕێڕەوی حوكمڕانی، ببنە هاوبەشیان".

 

لێدوانی فەرمی؛ فازڵ میرانی، بەرپرسی دەستەی کارگێڕیی مەکتەبی سیاسیی پارتی دیموكراتیی كوردستان لە هەژماری فەرمیی خۆی لە تۆڕی کۆمەڵایەتیی فەیسبووک بە دەنگدەرانی كوردستان دەڵێت، "لەگەڵمان وەرن بۆ پرۆژەی فراوانكردن و ڕاستكردنەوەی ڕێڕەوی حوكمڕانی، دەنگی ئێوە پابەندمان دەكات بەوەی، ئەو مافانەی دەتانەوێت بۆتانی جێبەجێ بكەین، و بە یاسا بیچەسپێنین و بەكردەوەش بەدواداچوونی بۆ بكەین.

 

میرانی لە بەشێکی دیکەی پەیامەكەیدا  دەڵێت، "هاونیشتمانیانی وڵاتی ئێمە، شایستەی هەموو ئەو شتانەن کە لێی بێبەشکراون یان دواخراوە، یان دەترسن لەوەی لەدەستی بدەن، لەگەڵمان بن و دەبینن چۆن پارێزگاریی لە مافەکانتان دەکەین و چۆن بەبێ هیچ منەتێک پێشکەشتانی دەکەین."

 

دووپاتیشی دەكاتەوە، "پارتی خەمی هەموو گەلانی عێراق هەڵدەگرێت، لە هەر کوێیەک بن، لە ناوەوە یان دەرەوەی عێراق، لە هەموو گوند و شارێک، لەسەر هەر کورسییەکی خوێندن، لەپێناو هەموو گوڵەگەنمێک، بۆ هەر کوڕ و کچێک، بۆ هەموو لاوان، بۆ فەرمانبەران، بۆ کاسبکارانی بازاڕ، بۆ ئەوانەی هەژار و برسیکراون و بەو هاوکارییانەی کە لە بنەڕەتدا موڵکی خۆیانە و منەتیان بەسەردا دەکرێت، بۆ خانەوادە سەربەرزە قوربانیدەرە بێبەشکراوەکان. لەگەڵمان بن، با پێکەوە سنوورێک بۆ نەهامەتییەکان دابنێین. هەرگیز دروست نییە ببینین مافەکانمان پێشێل دەکرێن یان تاکێک یان گرووپێک سازشیان لەسەر بکات.

 

زانیاریی زیاتر؛ بەرپرسی دەستەی کارگێڕیی مەکتەبی سیاسیی پارتی دیموكراتیی كوردستان لەکۆتاییدا نووسیویەتی، "ڕەوا نییە پۆست و پلەکان بەپێی میزاج و ئارەزوو ببەخشرێن. ناکرێت بێدەنگ بین لە ئاست ئەو مافانەمان، کە لێمان زەوت دەکرێت لەلایەن کەسانێکەوە کە بۆ بەرژەوەندیی خۆیان سوورن لەسەر دەستبەسەرداگرتنی چارەنووسی ئێمە، بە پشتیوانیی ئێوە و پێکەوە دەبینە بەربەستێکی پتەو لەبەردەم بەردەوامبوونی زیانەكان.