وەبەرهێنانی سۆران: لیژنەیەک سەرقاڵی چارەسەركردنی گرفتەكانی پرۆژەی كۆمەڵگەی لاوانی ڕواندزە

ئاڤا نیوز

بەڕێوەبەری گشتیی وەبەرهێنانی سۆران تایبەت بۆ ئاڤا ئاشكرای دەكات، لە ئاییندەیەكی نزیكدا، لیژنەی پێكهێنراو بۆ خستنەڕوو و چارەسەركردنی گرفتەكانی پرۆژەی كۆمەڵگەی لاوانی ڕواندز، ڕاپۆرتی خۆی بەرز دەكاتەوە، بۆ تەواوكردنی پرۆژەكە و نەهێشتنی كەموكوڕییەكانیشی، پرۆژەكە ڕادەستی وەبەرهێنەرێكی دیكە دەكەین.

وێنە گەورەكە: پرۆژەی نیشتەجێبوونی كۆمەڵگەی لاوانی ڕواندز، لە ساڵی 2009 مۆڵەتی وەبەرهێنانی پێدرا، كۆمپانیای بەڵێندەر لەسەرەتای جێبەجێكردنی پرۆژەكەوە، تێبینی لەسەر كارەكانی دروستبوو، دەركەوت چەند سەرپێچییەكی یاسایی ئەنجامداوە و بەشێك لەو زەوییانەی ناو پرۆژەكە كە بۆ باخچە و شوێنی گشتیی تەرخان كرابوون، بە نایاسایی كردوویەتی بە خانوو و فرۆشتوویەتیەوە، جگە لەوەش فێڵی لە چەند هاووڵاتیەك كردووە و بە ساختە گرێبەستی لەگەڵدا كردوون و چەندین سەرپێچی دیكەی ئەنجامداوە.

چی ڕوویدا: بەڕێوەبەرایەتیی گشتیی وەبەرهێنانی سۆران، مۆڵەتی كۆمپانیا بەڵێندەرەكەی هەڵوەشاندەوە، دواتر بە فەرمانی دەستەی گشتیی وەبەرهێنانی كوردستان، پرۆژەكە كرایەوە بە هەلی وەبەرهێنان.

لێدوانی فەرمی: دلڤان عومەر، بەڕێوەبەری گشتیی وەبەرهێنانی سۆران، تایبەت بە ئاڤا ڕایگەیاند، دوای هەڵوەشاندنەوەی مۆڵەتی پرۆژەكە، لیژنەیەكمان بۆ بەدواداچوون بە كێشە و گرفتەكانی پرۆژەكە پێكهێناوە كە لە ماوەی 45 ڕۆژدا، دیراسەی وردی بابەتەكە بكەن و ئێستا لیژنەكە لە كارەكانیان بەردەوامن. 

ئاماژەی بەوەشكرد، كۆمپانیای جێبەجێكار، هەڵساوە بە فرۆشتنی زەوی و خانووی ناو پرۆژەكە بە نایاسایی لەڕێگەی فێڵ و ساختە، هاوكات خزمەتگوزارییەكانی ناو ماستەرپلانی پرۆژەكە، وەك پێویست جێبەجێ نەكردوەوە.

دووپاتیشی كردەوە، پاش دیراسەكردن و دیاریكردنی كەموكوڕییەكان، پرۆژەكە ڕادەستی وەبەرهێنەرێكی دیكە دەكەین كە خۆی خوازیاری تەواوكردنی پرۆژەكە بێت.

پەیوەست بەم بابەتە: لەماوەی ڕابردوودا، بەڕێوەبەرایەتیی گشتیی وەبەرهێنانی سۆران، ئاگاداری سەرجەم خاوەن یەكەكانی نیشتەجێبوونی لە پرۆژەی كۆمەڵگەی لاوانی ڕواندز كردەوە، سەردانی بەڕێوەبەرایەتییەكە بكەن بەمەبەستی پشتڕاستكردنەوەی خاوەنداریەتیی یەكەكەكانیان لەناو پرۆژەكە.