ئەنجامی کۆتایی هەڵبژاردنەکانی ئەنجوومەنی گەل لە سووریا ئاشکرا دەکرێت

ئاڤا نیوز

وتەبێژی لیژنەی باڵای هەڵبژاردنەکانی ئەنجوومەنی گەل لە سووریا ڕایدەگەیێنێت، ئەنجامی کۆتایی هەڵبژاردنی ئەنجوومەنی گەل و ناوی کۆتایی براوەکانی هەڵبژاردن دەرچووە.

چیرۆکی سەرەکی: ڕۆژی 05-10-2025، بە بەشداری نزیکەی حەوت هەزار ئەندامی دەستەی دەنگدەران و هەزار و 578 کاندید، یەکەمین هەڵبژاردنی پەرلەمان لە دوای ڕووخانی دەسەڵاتەکەی ئەسەد لە سووریا بەڕێوەچوو. بەڵام لە چەند ناوچەیەک هەڵبژاردنەکە بە هۆکاری جیاواز نەکرا.

پەیامی فەرمی: نووار نەجمە، وتەبێژی لیژنەی باڵای هەڵبژاردنەکانی ئەنجوومەنی گەل لە سووریا، ئەمڕۆ شەممە (1ی تشرینی دووەمی 2025) لە پۆستێکدا لە هەژماری خۆی لە "ئێکس" ڕایگەیاند، ناوی کۆتایی براوەکانی هەڵبژاردنەکانی ئەنجوومەنی گەل دەرچووە.

زانیاریی زیاتر: بە گوتەی نەجمە، هێشتا ژمارەیەک کورسی لە هەندێک ناوچەی پارێزگاکانی ڕەققە و حەسەکە، هەروەها هەموو کورسییەکانی پارێزگای سوەیدا بە بەتاڵی ماونەتەوە تاوەکو هەڵبژاردنی تەواوکاری بۆیان ئەنجام دەدرێت.

ئەوەی پێشبینی دەکرێت: دیاریکردنی کاتی بەڕێوەچوونی یەکەم دانیشتنی ئەنجوومەنی گەل، دوای بڵاوبوونەوەی ناوی سێیەکی کۆتایی ئەندامان دێت کە لەلایەن سەرۆککۆمارەوە دادەنرێن، بە پێی دەقی ڕاگەیاندنی دەستووری.

ئەوەی پێویستە بیزانیت: پەرلەمانی نوێی سووریا لە 210 ئەندام پێکدێت، لەو ژمارەیەش 140 کورسیی بە دەنگدانی دەستەی دەنگدەران دیاری کراون و 70 پەرلەمانتارەکەی دیکەش لەلایەن سەرۆککۆماری سووریاوە دیاریی دەکرێن.