بوومەلەرزەیەک سنووری گەرمیانی هەژاند

ئاڤا نیوز

لە سنووری ئیدارەی گەرمیان بوومەلەرزە ڕوویدا، دانیشتووانی قەزای كەلار و ناحیەكانی ڕزگاری و سەرقەڵا هەستیان پێكردووە.

هۆكارە زانراوەكان: بەهۆی نزیكی دەڤەری گەرمیان، لە هێڵی تەكتۆنیی زنجیرە چیاكانی زاگرۆس لە ڕۆژهەڵاتی كوردستان كە ئەوناوچەیە بەردەوام بە ناوچەی زۆنی سووری ڕوودانی بوومەلەرزە دادەنرێت، جار جارە، هێزی بوومەلەرزەكە بەجۆرێک درێژدەبێتەوە كە لە ناوچە سنوورییەكانی هەرێمی كوردستانیش هەستی پێ دەكرێت.

لێدوانی فەرمی: هاونیشتمانیانی ئیدارەی گەرمیان بە ئاڤایان وت، بوومەلەرزە بەهێز بووە و بەتەواوی هەستی پێكراوە، بەڵام بەپێی قسەی هاووڵاتییان، زیانێكی ئەوتۆی گیانی و ماددی نەبووە.

بڵاوکراوەی فەرمی: دەستەی گشتیی کەشناسی و بوومەلەرزەزانی عێراق ڕایگەیاند: چەقی بوومەلەرزەکەی کەلار نزیک شارۆچکەی کفری بووە بە دووری 25 کیلۆمەتر لە پارێزگای دیالەوە، کە گوڕەکەی 4.3 پلە بووە بە پێوەری ڕێختەر.

ئەوەی پێویستە بیزانیت: تاوەكو ئێستا دەزگای كەشناسی و بوومەلەرزەزانی هەرێمی كوردستان لەسەر بوومەلەرزە و هێزی گوڕەكەی ڕوونكردنەوەی نەداوە، هەر بۆیە زەرەر و زیانەکانی دیار نییە.