بەشێکی شەقامی 100 مەتری سلێمانی دەکرێتەوە

ئاڤا نیوز

لەماوەی چەند ڕۆژی داهاتوودا، 26 کیلۆمەتر لە شەقامی 100 مەتری شاری سلێمانی بەڕووی هاتووچۆی هاونیشتمانیان دەکرێتەوە، کە دەبێتە هۆی هێنانە کایەی ئاسانکاریی زیاتر بۆ شۆفێران. 

وێنە گەورەکە: پڕۆژەی شەقامی 100 مەتری شاری سلێمانی پڕۆژەیەکی ستراتیژییە، ساڵی 2012 دیزاینی بۆ کراوە، بەڵام نەتوانرا جێبەجێ بکرێت، تا  لە 11-7-2020 سەرۆکوەزیران مەسرور بارزانی، بەردی بناغەی پڕۆژەکەی دانا و دەست بە کارکردن لە شەقامەکە کرا، کە 400 ملیار دیناری بۆ تەرخان کراوە.

ئەوەی ئێستا ڕوودەدات: کارکردن لە قۆناغی یەکەمی پڕۆژەکە بە خێرایی جێبەجێ دەکرێت، درێژییەکەی 37 کیلۆمەترە و چەند ڕۆژی داهاتوو 26 کیلۆمەتری شەقامەکە دەکرێتەوە.

لێدوانی فەرمی: زەردەشت ڕەفیق، گوتەبێژی شارەوانیی سلێمانی، بە ئاڤا میدیای گوت: ئەو 26 کیلۆمەترە تەواو بووە، کە تاسڵوجە بە شەقامی تانجەڕۆ دەبەستێتەوە، شەقامەکە لە ڕێگەی بەرزە پردێکەوە بە گەڕەکی بەکرەجۆش دەبەسترێتەوە.

بۆچی گرنگە: کردنەوەی ئەو بەشەی شەقامەکە کارئاسانی زۆر بۆ هاتووچۆی هاونیشتمانیان و جموجۆڵی بازرگانی دەکات، هاوکات قەرەباڵغی ناوشاری سلێمانی کەمدەکاتەوە.

زانیاریی زیاتر: شەقامەکە لەلایەن کۆمپانیایەکی خۆماڵی بە ستانداردی جیهانی دروست دەکرێت، یەک ئۆڤەر پاس، پێنج ئەندەر پاس، یەک پردی بەرز، حەوت یەکتربڕ و 68 ئاوبەرە لەخۆ دەگرێت.