بۆنە ناخۆشەکەی ژمارەیەک گەڕەکی هەولێر چارەسەر کرا

ئاڤا نیوز

چەند ڕۆژێکە  لە هەندێك گەڕەكی شاری هەولێر كە دەكەونە سەر ڕێگای هەولێر – كۆیە، بۆنێكی ناوخۆش بڵاو بوبووەوە و دانیشتووانی ناوچەكەی هەراسان كردبوو، هۆكارەكەی ئاشكرا کرا و چارەسەری کرا.

چیرۆکی سەرەکی: لە دوو ڕۆژی ڕابردوودا لە گەڕەکەکانی ئایندە و هەولێر سیتی و لاوان و ئەندازیاران و ئاشتی و چەند گەڕەكێكی دیكە کە دەكەونە ڕۆژهەڵاتی شاری هەولێر، بۆنێكی ناخۆش بڵاو بوبووەوە كە دانیشتووانی ئەو گەڕەكانەی هەراسان كردبوو، لایەنی پەیوەندیدار هەر زوو بەدواداچوونیان بۆ بابەتەكە كرد.

زانیاریی بەدەستهاتوو: بەپێی زانیارییەكان هۆكاری بۆنە ناخۆشەكە شۆفێرێك بووە كە پاشماوەی نێو تانكەرەكەی لە نزیك ئەو گەڕەكانە ڕشتووە و فڕێداوە كە بریتی بووە لە پاشماوەی سووتەمەنی.

لێدوانی فەرمی: ئومێد خۆشناو، پارێزگاری هەولێر بە ئاڤا میدیای ڕاگەیاند، دوای ئاگادارکردنەوەمان تیمێکمان ڕاسپارد بەدواداچوون بۆ بابەتەکە بکەن و ڕاستەوخۆ شوێنەکەیان پاک کردەوە، لێکۆڵینەوەش لە بابەتەکە دەستیپێکردووە و لایەنی پەیوەندیدار بەدوای دۆزینەوەی شۆفێرەکەوەن بۆ ئەوەی ڕێککاری یاسایی بەرامبەر بگرنەبەر.

لەلایەكی دیكەوە: موقەدەم شاخەوان سەعید، وتەبێژی بەرگریی شارستانیی هەولێر بە ئاڤا میدیای گوت: لە دەوروبەری گەڕەكەكان چەند چاڵ و ڕێڕەوی ئاوی قورس هەن و بوونەتە شوێنی فڕێدانی پاشماوە و پیسکردنی ژینگە، ڕاپۆرتی خۆمان بەرزکردووەتەوە و داوامان کردووە ئەم چاڵانە پڕ بکرێنەوە بۆ ئەوەی چیتر ژینگەی ئەو شوێنانە پیس نەکرێن.