پڕۆژەی ئاوی گۆپتەپە - چەمچەماڵ زیاتر لە 21%ـی جێبەجێ کراوە کارکردن لە دوو پڕۆژەی دیکەش دەستپێدەکات

ئاڤا نیوز

کارکردن لە پڕۆژەی ئاوی گۆپتەپە - چەمچەماڵ بەردەوامە و زیاتر لە 21٪ی پڕۆژەکە جێبەجێ کراوە، ئامادەکاریش بۆ دەستپێکردنەوەی پڕۆژەی ئاوی دەربەندیخان و  پڕۆژەی ئاوی سلێمانی دەکرێت.

وێنە گەورەکە: کابینەی نۆیەمی حکومەتی هەرێمی کوردستان ژمارەیەک پڕۆژەی ستراتیژیی دابینکردنی ئاوی خواردنەوەی جێبەجێ کردووە، ژمارەیەک پڕۆژەش لە باری جێبەجێ کردنن، هەموو ئەو پڕۆژانەش کێشەی ئاوی خواردنەوە بۆ ماوەی درێژ چارەسەر دەکەن و پشت بە سەرچاوەی ئاوی سەرزەوی سەبەستن.

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆی هەرێمی کوردستان بە ئاڤا میدیای گوت: پڕۆژەی ئاوی گۆپتەپە - چەمچەماڵ، لە یەک کاتژمێردا توانای دابینکردنی سێ هەزار و 400 مەترسێجا ئاوی هەیە زیاتر لە 21%ـی کارەکانی جێبەجێ کراوە.

ئاری ئەحمەد ئەمانەشی وت:

پڕۆژی ئاوی دووکان - سلێمانی، لە یەک کاتژمێردا توانای دابینکردنی 20 هەزار مەتر سێجا ئاوی هەیە، پڕۆژەکە ڕادەستی بەڵێندەر کراوە و لیژنەی سەرپەرشتی بۆ دانراوە و لە داهاتووێکی نزیک دەچێتە باری جێبەجێ کردن.

پڕۆژەی ئاوی دەربەندیخان، کە لە یەک کاتژمێردا توانای بەرهەمهێانی هەزار مەترسێجا ئاوی هەیە و دەتوانرێت لە داهاتوو 500 مەتر سێجا توانای پڕۆژەکە بەرز بکرێتەوە، دەستپێکردنەوەی کارکردن لەو پڕۆژەیە دەستیان پێکردووە، کارە مەدەنییەکان تەواو بوون، ئێستا کار بۆ دابینکردنی پێداویستیەکانی پڕۆژەکە و ئامێرە کارەباییە پێویستەکان دەکرێت.

بۆچی گرنگە: بە تەواوبوونی ئەو پڕۆژانە، کێشەی ڕیشەیی ئاوی خواردنەوە لە سلێمانی و چەمچەماڵ و دەربەندیخان دەکەن، هاوکات بەکار‌هێنانی ئاوی ژێرزەویش کەم دەکاتەوە، ئەمەش هەنگاوێکی گرنگە لە پارێزگاری لە ئاوی ژێرزەوی و کەمکردنەوەی زیانەکانی گۆڕانی کەشوهەوا.