ڕێگا نادرێت هیچ زیندانییەکی لالەزار کەسوکارەکەی ڕووبەڕوو ببینێت

ئاڤا نیوز

دوو مانگ و دە ڕۆژ بەسەر هێرشی هێزەکانی یەکێتی بۆ سەر لالەزار لە سلێمانی تێپەڕیوە و هێشتا دۆخی دەستگیرکراوان، بە تایبەتی لاهوور شێخ جەنگی و کەسە نزیکەکانی نادیارە. ڕێگە نەدان بە بینینی ڕووبەڕووی کەسوکار و مانەوەی کەیسەکان بە هەڵواسراوی، نیگەرانییەکی زۆری دروست کردووە، لە کاتێکدا چارەنووسی دوو ملیۆن دۆلاری یانەی نەورۆز و دۆخی سەختی خێزانی دەستگیرکراوان گومان و پرسیاری زۆری لێکەوتووەتەوە.

چیرۆکی سەرەکی: دوای تێپەڕبوونی نزیکەی 70 ڕۆژ بەسەر ڕووداوەکانی لالەزار لە سلێمانی، دۆخی ئەو گەنجانەی دەستگیرکراون و لە زیندانەکانی هێزەکانی یەکێتی دان، هێشتا بە نادیاری ماوەتەوە. ئاڤا زانیاری بەدەست گەیشتووە کە تا ئێستا ڕێگا نادرێت هیچ زیندانییەک کەسوکارەکەی بە شێوەیەکی ڕووبەڕوو ببینێت. بەڵکو تەنیا لە پشت سیمێکەوە و لە دوورەوە دەتوانن یەکتر ببینن.

لێدوانی فەرمی: سلێمان موحسین، بەڕێوەبەری ڕاگەیاندن و پەیوەندییەکانی دەستەی سەربەخۆی مافی مرۆڤ، بە ئاڤای ڕاگەیاند، نووسراومان کردووە و ناڕەزایمان دەربڕیوە لەو جۆرە مامەڵەیە، لە کوردستان لە هیچ زیندانێک مامەڵەی ئاوا لەگەڵ زیندانیان ناکرێت.

زانیاریی زیاتر: لەبارەی شوێنی لاهوور شێخ جەنگی و پۆڵادی برایەوە، زانیارییەکان ئاماژە بەوە دەکەن کە لە زیندانی کانی گۆمەوە گواستراونەتەوە بۆ زیندانی ئاسایشی سلێمانی. بەڵام دۆخی کەسە نزیکەکانی لاهوور شێخ جەنگی وەک پاسەوان و سکرتێرەکەی، نادیارە و شوێنی زیندانیکردنیان گۆڕدراوە و کەس نازانێت بۆ کوێ براون. سلێمان موحسین جەختیشی کردەوە کە تا ئێستا هیچ کەسێک لەوانەی دەستگیرکراون دادگایی نەکراون و کەیسەکانیان بە هەڵواسراوی ماوەتەوە.

لەلایەکی دیکەوە: لەبارەی پرسی دوو ملیۆن دۆلارەکەی یانەی نەورۆز، ئاڤا زانیویەتی کە لە کاتی هێرشەکەی هێزی کۆماندۆ بۆ سەر لالەزار و نزیکبوونەوەیان لە لاهوور شێخ جەنگی، ناوبراو بە یەکێک لە چەکدارەکانی وتووە کە بڕی دوو ملیۆن و 350 هەزار دۆلار لە ژوورێکی نەسووتاودا هەیە و ئەمانەتی ئەوان بێت، چونکە پارەی یانەی نەورۆزە. بەڵام تا ئێستا چارەنووسی ئەو پارەیە نادیارە و کەس نازانێت چی بەسەر هاتووە و کێ بردوویەتی.

جگە لەمانەش، ئاڤا زانیویەتی کە قوفڵ لە دەرگای ماڵی چەند خزمێکی نزیکی لاهوور شێخ جەنگی وەک ماڵە خەزووری دراوە و ڕێگا نادرێت کەس بگەڕێتەوە سەر ماڵ و حاڵی خۆی. ئەم خێزانانە ئێستا بێ شوێن ماونەتەوە و هەر شەوێک لە ماڵێک دەمێننەوە.

زانیاریی بەدەستهاتوو: یەکێک لە خێزانی دەستگیرکراوان، خێزانی کوردۆ محەممەدە، کە شەوی هێرشەکەی لالەزار دەستگیرکرا، بە ئاڤای ڕاگەیاندووە کە هاوسەرەکەی بۆ بژێوی ژیانی بووبووە پێشمەرگە، دوای دەستگیرکردنی کوردۆ، کچێکمان بووە و هێشتا باوکی نەیبینیوە، وتیشی کە کرێچین و ژیانێکی سەختمان هەیە، هەموو ڕۆژ منداڵەکانم بە گریانەوە چاوەڕوانی تەلەفۆنێکی باوکیانن.

ئەم ژنە پەیامێکی ئاراستەی بافڵ تاڵەبانی کرد و ڕایگەیاند: "کاک بافڵ باسی مافی کورد دەکات لە بەغدا، با سەرەتا مافی من بداتەوە ئەو کات باسی مافی کورد بکات."