شەرع سەردانی کۆشکی سپی دەکات

ئاڤا نیوز

بڕیارە هەفتەی داهاتوو ئەحمەد شەرع، سەرۆککۆماری نوێی سووریا بچێتە کۆشکی سپی و لەگەڵ دۆناڵد ترەمپ، سەرۆکی ئەمریکا کۆببێتەوە، بە وتەی بەرپرسانی ئەمریکا دوای سەردانەکەی شەرع، سووریا بە فەرمی دەبێتە ئەندامی هاوپەیمانیەتیی نێودەوڵەتیی دژی داعش.

لێدوانی فەرمی: تۆم باراک، نێردەی تایبەتی ئەمریکا بۆ سووریا پشتڕاستیکردەوە، ئەحمەد شەرع، سەرۆککۆماری سووریا لە 10ـی نۆڤمبەر لە کۆشکی سپی لەگەڵ دۆناڵد ترەمپ، سەرۆکی ئەمریکا کۆدەبێتەوە.

- باراک ئاماژەی بەوەشکرد، ئامانج لە سەردانەکە واژۆکردنی ڕێککەوتننامەی بەئەندامبوونی سووریایە لە هاوپەیمانیی نێودەوڵەتیی دژی داعش کە لە ساڵی 2014 دامەزراوە و لەلایەن ئەمریکاوە سەرکردایەتیی دەکرێت.

ئەوەی پێویستە بیزانیت: بەگوێرەی لیستی وەزارەتی دەرەوەی ئەمریکا، مێژووی سەردانەکانی سەرکردە بیانییەکان، ئاماژە بەوە دەکات کە هیچ سەرۆکێکی پێشووی سووریا سەردانێکی فەرمی بۆ واشنتن نەکردووە، بەم پێیە شەرع یەکەم سەرۆکی سووریایە بە فەرمی بچێتە واشنتن.

بۆچی گرنگە: هەرچەندە شەرع پێشتر سەردانی نیویۆرکی کردبوو بە مەبەستی بەشداریکردن لە کۆبوونەوەیەکی نەتەوە یەکگرتووەکان لە مانگی ئەیلوول، بەڵام ئەم سەردانەی شەرع دەبێتە یەکەم سەردانی سەرکردەیەکی سووریا بۆ واشنتن.