هاكان فیدان: ڕێككەوتنی ئاو ئێجگار گرنگە و كۆتایی بە كێشەی كەمئاوی دەهێنێت لە عێراق

ئاڤا نیوز 

وەزیری دەرەوەی توركیا ڕایگەیاند ئەمڕۆ واژۆ لەسەر ڕێككەوتنی ئاو دەكەن و دەبێتە گەورەترین پرۆژەی وەربەرهێنانی ژێرخانی ئاو لە عێراق و هیوای خواست بەم هۆیەوە كێشەی كەمئاوی لە عێراق چارەسەربكرێت.

وێنە گەورەكە: ئەمڕۆ 2-11-2025 هاكان فیدان گەیشتووەتە بەغدا و بڕیارە بە ئامادەبوونی محەمەد شیاع سودانی، سەرۆكوەزیرانی عێراق واژۆ لەسەر ڕێككەوتنی ئاو لەنێوان توركیا و عێراق بكرێت بۆ بەردانەوەی ئاو لە توركیاوە بۆ نێو خاكی عێراق و چاككردنی ژێرخانی ئاو لە عێراق.

لێدوانی فەرمی: هاكان فیدان، وەزیری دەرەوەی توركیا لە میانی كۆنفرانسێكی ڕۆژنامەوانیدا لەگەڵ فوئاد حوسێن، جێگری سەرۆكوەزیران و وەزیری دەرەوەی عێراق ئاماژەی بەوە دا چەندین ساڵە هەردوو وڵات هەوڵی دۆزینەوەی ڕێگەچارەیەك دەدەن بۆ چارەسەركردنی كێشەی كەمئاوی و بەكارهێنانی ئاو بە شێوەیەكی باش.

پێویستە ئەمەش بزانیت: هاكان فیدان باسی لەوە كرد لەماوەی دوو ساڵ و نیوی ڕابردوودا كاری زۆر گرنگیان ئەنجامداوە بۆ چارەسەركردنی ئەم كێشەیە و دەڵێت: هیوادارین لە ڕێگەی ئەم ڕێككەوتنەی ئەمڕۆوە سیستەمی بەكارهێنانی ئاو لە عێراق چاكبكرێت و ببێتە گەورەترین پرۆژەی وەبەرهێنانی ژێرخان لە عێراق و گوتی: خوا یار بێت ئەمە دەبێتە هۆی چارەسەركردنی كێشەی كەمئاوی لە عێراق.

بە تەنیشت ئەم بابەتەوە: هاكان فیدان ئاماژەی بە پتەوتركردنی پەیوەندییەكان لە بوارە جیاوازەكان لەگەڵ عێراق كرد و گوتی: كات ئەوەمان لێ دەخوازێت وڵاتانی ناوچەكە هەماهەنگی یەكتر بن بۆ گەشەكردنی ناوچەكە، لەبری ڕكابەرێتی و ململانێ. توانا و ئیرادەی ئەوەمان هەیە خۆمان كێشەكانی نێوانمان چارەسەر بكەین، نەك ئەو چاوەڕوانییەمان لە وڵاتانی دیكە هەبێت.

لە لایەكی دیكەوە: وەزیری دەرەوەی توركیا بڕیاری پەكەكەی بۆ كشانەوەی هێزەكانی و كۆتایی هێنان بە چالاكییەكانی لە توركیا و باكووری كوردستان بە گرنگ زانی و داوای لەو گروپانەش كرد كە لەژێر چەتری كەجەكەدا كاردەكەن و توركیا وەك پەكەكە ناویان دەهێنێت لە سێ پارچەكەی دیكەی كوردستانیش هەمان بڕیار بدەن و دەستبەرداری ئەو ناوچانە بن، كە كۆنتڕۆڵیان كردوون.