چەند پەیامێکی ئاگرین لە مەسرور بارزانییەوە بۆ نەیارانی و تەواوی خەڵکی کوردستان

ئاڤا نیوز

لە کەرنەڤاڵێکی جەماوەری لە شەقڵاوە، مەسرور بارزانی، جێگری سەرۆکی پارتی دیموکراتی کوردستان وتی، جەماوەری پارتی هەمیشە ڕووبەڕووی پیلانی ناحەزان وەستاونەتەوە.

چیرۆکی سەرەکی: ئەمڕۆ یەکشەممە بە ئامادەبوونی مەسرور بارزانی، جێگری سەرۆکی پارتی دیموکراتی کوردستان، کەرنەڤاڵێکی جەماوەری گەورە بۆ بانگەشەی هەڵبژاردن و پشتگیری لە لیستی 275ـی پارتی لە شەقڵاوە بەڕێوەچوو.

پەیامی فەرمی: مەسرور بارزانی لە کەرنەڤاڵە جەماوەرییەکەی پارتی ڕایگەیاند: مێژووی پارتی دیارە و هیچ هێزێک ناتوانێت بمانچەمینێت، نوێنەرانی پارتیش وەک لایەنەکانی دیکە ڕێککەوتنی ژێربەژێر ناکەن.

لە بەشێکی دیکەی قسەکانیدا مەسرور بارزانی ڕایگەیاند: جەماوەری پارتی هەمیشە ڕووبەڕووی پیلانی ناحەزان وەستاونەتەوە، ئەو پرسیارەش لە خۆتان بکەن جگە لە نوێنەرانی پارتی کام لایەن لە بەغدا بەرگری لە مافەکانی خەڵکی کوردستان کردووە؟، بۆئەوەی کوردستان بەهێزبێت دەبێت پارتی بەهێز بێت.

"ئێستا لەسەر ئاستی کوردستان پارتی هیچ ڕکابەرێکی نەماوە، دەبێت لە بەغداوە ڕێگری لە پیلانی دوژمنانی کوردستان بکەین، ئەوەش بزانن بۆ پارتی خەڵک و خاکی کوردستان ئامانجە و ئامادەیە خۆی بۆ بەخت بکات."

مەسرور بارزانی لە وتارەکەیدا ئەمانەشی وت:

٠ دەبێت کاندیدەکانی پارتی سەرکەون بۆ ئەوەی بەرگری لەمافی هەموو پێکهاتەکان بکەن.

٠ مێژووی پارتی دیارە، شاخی سەفین شاهێدی داستانەکانی پارتین.

٠ لایەنە ناحەزەکان ئەوەی لێرە پێیان کرا کردیان و نەیانتوانی بمانوەستێنن.

٠ لایەنەکانی دیکە جگە لە قسە هیچ دەسکەوتێکیان بۆ هەرێمی کوردستان نەبووە.

٠ پارتی خۆی بە خاوەنی هەموو خاکی کوردستان دەزانێت.

٠ با هیچ کەسێک وا بیرنەکاتەوە خاوەنی بەشێکی هەرێمی کوردستانە، چونکە پارتی خاوەنی هەرێمی کوردستانە.

٠ ڕێگریکردن لە پێکهێنانی حکومەتی هەرێمی کوردستان دەسکەوت نییە.

٠ پارتی بە هیچ جۆرێک ئامادەنییە سازش لەسەر ئەوە بکات پلە و پۆست ببێتە بنەمای پێکهێنانی حکومەت.

٠ حکومڕانی بە دز و گەندەڵ و مافیا ناکرێت، حکومڕانی بە خەڵکی دڵسۆز دەکرێت.

٠ ئازادی ئەوەنییە بە تۆپ و تانک بڕۆیتە سەر هۆتێلێک یان بچێتە سەر ئۆپۆزسیۆنی خۆت.

٠ ئەوانەی باسی ئازادی دەکەن مەرجە خۆیان بەکرێگیراو نەبن.

٠ حوکمڕانی بە خەڵکی دیکە ناکرێت بەس بە پارتی دەکرێت.

٠ ئەوەی ئامادەبووە خاک بفرۆشێت، چۆن ئێستا دڵسۆزی خاکەکەی دەبێت.