لێدوان و چاوپێکەوتن لە شاسوار عەبدولواحید لە زیندان قەدەغە کرا

ئاڤا نیوز

بڕیار بوو کەناڵی ئێن ئاڕ تی بەرنامەیەکی تۆمارکراوی دەنگی لەگەڵ شاسوار عەبدولواحید بڵاو بکاتەوە، بەڵام ئێن ئاڕ تی دەڵێت هێزێک هەڵیکوتاوەتە سەر کەناڵەکەیان و ڕێگەیان پێنەداون پەخشی بکەن.

چیرۆکی سەرەکی: بڕیار بوو کەناڵی ئێن ئاڕ تی کاتژمێر 07:00ـی ئێوارەی ئەمڕۆ بەرنامەیەکی تایبەت لەگەڵ شاسوار عەبدولواحید، سەرۆکی جووڵانەوەی نەوەی نوێ بڵاوبکاتەوە، بەڵام ئێن ئاڕ تی دەڵێت هێزێک هەڵیکوتاوەتە سەر کەناڵەکەیان و ڕێگەیان پێنەداون پەخشی بکەن.

ئاڤا زانیویەتی بەرنامەکە دەنگی و تۆمار کراو بووە، پەیوەست بووە بە هەڵبژاردن و  لەڕێگەی تەلەفۆنەوە لەگەڵی کراوە.

جووڵانەوەی نەوەی نوێش بڵاوی کردووەتەوە هێزەکە سەر بە وەزارەتی ناوخۆی کوردستان بووە، بەڵام هیچ وێنە و ڤیدیۆیەکی هێزەکەیان بڵاونەکردەوە. 

زانیاریی تایبەت: بەپێی سەرچاوەیەکی ئاڤا لەناو ئێن ئاڕ تی، ئێوارەی ئەمڕۆ پۆلیس چوونەتە کەناڵی ئێن ئاڕ تی، پێیان گوتوون نابێت بەرنامەکە پەخش بکرێت.|

کارمەندێک چووەتەوە ژوورەوە جلی مەدەنی لەبەر بووە، ناسنامەیەکی تایبەتی پێبووە لەگەڵ نووسراوێکی فەرمی، پێیگوتوون بە بڕیاری وەزارەتەکانی ناوخۆ و ڕۆشنبیری نابێت بەرنامەکە پەخش بکرێت.

کارمەندەکە ڕوونی کردووەتەوە بەپێی یاسا بەکارهێنانی وێنە و دەنگی کەسێکی سزادراو لە زیندان نابێت بۆ هیچ مەبەستێک بەکاربهێنرێت.

زانیاریی پەیامنێر: دەنگۆ بڵاوبووەتەوە هێز برابێتە سەر کەناڵی ئێن ئاڕ تی، بەڵام چۆمان مەحموود، پەیامنێری ئاڤا چووەتە لای ئێن ئاڕ تی وەک خۆی دەڵێت هیچ هێزێکی نەدیوە.

لێدوانی فەرمی: سەرکەوت ئەحمەد، گوتەبێژی پۆلسی سلێمانی بە ئاڤای وت،  ئاگادار نین و هیچ هێزێک لە دەوروبەری ئێن ئاڕ تی جێگیر نەکراوە و نەبینراوە.

باکگراوند؛ شاسوار عەبدولواحید بە ماددەی 431 لە یاسای سزادانی عێراقی لەسەر کەیسی هەڕەشە و ناوزڕاندن سزای پێنج مانگ زیندانیکردنی بەسەردا سەپێنراوە. لە 12-8-2025 دەستگیر کراوە و ئێستا حوکمەکەی تەواو دەکات. جگە لەوە نزیکەی 80 کەیسی تری لەسەرن و هێشتا یەکلانەکراونەتەوە، زۆربەی کەیسەکانیش پەیوەندییان بە پشکەکانی چاڤی لاندەوە هەیە.