خێزانێکی کورد لە ئەڵمانیا بە زۆر دیپۆرتی کوردستان دەکرێنەوە

ئاڤا نیوز

خێزانێکی چوار کەسیی خەڵکی دهۆک، دوای پێنج ساڵ ژیان و خوێندن و کارکردن لە ئەڵمانیا، بە شێوەیەکی لەناکاو و درەنگانی شەو دیپۆرت کرانەوە بۆ کوردستان. ئەم ڕووداوە کاردانەوەی گەورەی لێکەوتووەتەوە لە ئەڵمانیا.


چیرۆکی سەرەکی: خێزانێکی خەڵکی دهۆک کە پێکهاتوون لە دایک و باوکێک و دوو کوڕ ماوەی پێنج ساڵە لە هەرێمی زاگسن لە ئەڵمانیا نیشتەجێ بوون. لەو ماوەیەدا کوڕەکان و دایکیان سەرقاڵی خوێندن بوون، و باوکیشیان وەک سەرتاش کاری کردووە. تەنیا کوڕە گەورەکەیان، کە ئیقامەی خوێندنی هەبووە، توانیبووی زووتر ئیقامە وەربگرێت، چونکە بە پەلە دەستی بە خوێندن کردبوو لە پەیمانگایەک. بەڵام دایک و باوک و کوڕە بچووکەکەیان، لە کاتێکدا هەموو شتێکیان یاسایی بووە و تەنیا یەک مانگ مابوو ئیقامەیان پێبدرێت، تووشی دیپۆرتکردنەوە بوون.

شەوی 28ـی مانگی ڕابردوو، هێزێکی زۆری پۆلیس بەبێ هیچ ئاگادارکردنەوەیەکی پێشوەختە، هەڵیانکوتاوەتە سەر ماڵەکەیان. بە پەلە داوایان لێکردوون کە خۆیان ئامادە بکەن بۆ فڕۆکەخانە، تەنیا 10 خولەکیان پێداوە بۆ ماڵئاواییکردن لە کوڕە گەورەکەیان. دواتر ڕاستەوخۆ گواستراونەتەوە بۆ فڕۆکەخانە و لەوێوە بە فڕۆکە نێردراونەتەوە بۆ بەغدا و پاشان گەڕاونەتەوە دهۆک.

کاردانەوەکان: ڕووداوەکە کاردانەوەیەکی گەورەی لە ئەڵمانیا لێکەوتووەتەوە. لە یەکێک لە ماڵپەڕەکانی پەنابەران، نزیکەی 23 هەزار کەس ناڕەزایەتییان دەربڕیوە لەبارەی دیپۆرتکردنەوەی ئەم خێزانە. کوڕە بچووکەکەی خێزانەکەش ڤیدیۆیەکی لە ئینستاگرام بڵاوکردووەتەوە و بە زمانی ئەڵمانی باسی لە چیرۆکی دیپۆرتکردنەوەکەیان کردووە، کە ڤیدیۆکە نزیکەی یەک ملیۆن بینەری هەبووە و هەزاران کۆمێنتی بۆ نووسراوە. ئەمەش وای کردووە کۆمەڵێک ڕێکخراوی تایبەت بە پەنابەران و مافی مرۆڤ پشتگیری کەیسەکەیان بکەن و بێنە سەر هێڵ، بەڵام تا ئێستا حکومەتی ئەڵمانیا بە فەرمی هیچ لێدوانێکی لەسەر ئەم کەیسە نەداوە.