مەرجەکانی هاوردەکردنی ئۆتۆمبێل بۆ هەرێمی کوردستان گۆڕانکارییان بەسەردا دێت؟

ئاڤا نیوز
 

عێراق بۆ ساڵی نوێ چەند بڕیارێک لەبارەی هاوردەکردنی ئۆتۆمبێلەوە دەردەکات، ئاڤا میدیا بەدواداچوون بۆ جێبەجێکردنی ئەو بڕیارانە لە هەرێمی کوردستان دەکات. 

وێنە گەورەکە: بەهۆی کەمیی جۆری هۆکارەکانی گواستنەوەی وەک میترۆ و شەمەندەفەر، بەشی هەرە زۆری هاونیشتمانییانی هەرێمی کوردستان و عێراق بۆ هاتووچۆکردن بەشێوەیەکی سەرەکی پشت بە ئۆتۆمبێل دەبەستن، بۆیە خواستی بەردەوام لەسەر کڕینی ئۆتۆمبێل هەیە، بەمەش ڕۆژانە دەیان جۆری جیاوازی ئۆتۆمبێل هاوردەی هەرێمی کوردستان دەکرێن.

چیرۆکی سەرەکی: بەپێی بڕیارێكی وەزارەتی پلاندنانی عێراق لە 1-1-2026ـەوە، بە هیچ شێوەیەک ڕێگە نادرێت ئۆتۆمبێلی بەکارهاتووی سووتاو، ژێرئاو کەوتوو، ئەوانەی تووشی زیانی گەرەبوون هاوردەی وڵاتەکە بکرێت، ئاڤا میدیا لە هەرێمی کوردستان بەدواداچوون بۆ پرسەکە دەکات. 

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازی بە ئاڤای وت: ئێمە ئۆتۆمبێل بەپێی ڕێنماییەکانی وەزارەتی ناوخۆ و وەزارەتی بازرگانی هەرێمی کوردستان ئۆتۆمبێل هاوردە دەکەین، مەرجیشە ئۆتۆمبێلەکە سووتاو، شانسی بڕاوە، لەحیم کراو و ژێرئاو کەوتوو نەبێت، هەروەها بەردی گزۆزی دەرنەهێنرا بێت. مەرجەکانیش بەم شێوەیە دەمێننەوە. 

ژمارەکان وا دەڵێن: لە 11 مانگی ڕابردوودا 758 مۆڵەتی هاوردەکردنی ئۆتۆمبێل بە بازرگانان دراوە، بەم مۆڵەتانە 158 هەزار و 399 ئۆتۆمبێل هێنراونەتە هەرێمی کوردستان.