ئەو دوو کەسەی لە شەقامی 120 مەتری هەولێر بە هەڕەمەکی تەقەیان دەکرد دەستگیرکران

ئاڤا نیوز

پۆلیسی هەولێر ئەو دوو تەقەکەرەی دەستگیرکرد کە ئەمشەو بۆ بانگەشەی هەڵبژاردن لە نزیک شەقامی 120 مەتری هەولێر بە هەڕەمەکی تەقەیان دەکرد.

چیرۆکی سەرەکی: بە پێی ئەو گرتە ڤیدیۆیەی کە بەڕێوەبەرایەتیی پۆلیسی پارێزگای هەولێر بڵاوی کردووەتەوە، وا دەردەکەێت لە نزیک شەقامی 120 مەتری هەولێر دوو کەس لە ئۆتۆمبێلێکی ڕەنگ سپی تایبەت دادەبەزن و تەقەی هەوایی دەکەن، بەو هۆیەوە لە لایەن پۆلیسەوە دەستگیرکران.

بڵاوکراوەی فەرمی: بەڕێوەبەرایەتیی پۆلیسی پارێزگای هەولێر بڵاوی کردەوە، لە دوای ئاگادارکردنەوەمان لە لایەن چەند هاونیشتمانییەکی شاری هەولێر، بە بیستنی تەقە کردن لە نزیک شەقامی خێرای 120 مەتری، بۆمان دەرکەوت ئۆتۆمبێلێک لە جۆری  (mg) ڕەنگ سپی هەڵگری تابلۆی هەولێر، دوو سەرنشینی تێدا بوو بە شێوەی هەڕەمەکی تەقە دەکەن. ئەمەش وەک بانگەشەی هەڵبژاردن بۆ لایەنێکی سیاسی دیاریکراو، دوای وەرگرتنی ڕەزامەندی دادوەری لێکۆلینەوەی هەولێر توانرا هەردوو تۆمەتبار بە ناوەکانی (م. ح. ص) و (س. ت. ت) دەستگیر بکرێن.

زانیاریی زیاتر: پۆلیسی پارێزگای هەولێر، هۆکاری دەستگیرکردنی ئەو دووکەسەی ئاشکراکرد و ڕایگەیاند: تۆمەتبارەکان بە پێچەوانەی ڕێنماییەکان و بڕیارەکانی کۆمسیۆنی باڵای هەڵبژاردنەکان و یاسا بەرکارەکانی هەرێمی کوردستان، ببوونە هۆکاری دروستکردنی پشێوی و بڵاوکردنەوەی دڵەڕاوکێ لەناو هاونیشتمانیانی شاری هەولێر. ئێستا بە بڕیاری دادوەری لێکۆڵینەوەی هەولێر ڕاگیراون و لێکۆڵینەوەش لەگەڵیاندا بەردەوامە.

گۆشەیەکی دیکەی دیمەنەکە: پۆلیسی پارێزگای هەولێر، هاونیشتمانیانی پارێزگای هەولێر ئاگادار دەکاتەوە کە هەر کەس و لایەنێک ببێتە هۆکاری پشێوی و تێکدانی ئارامی پارێزگای هەولێر ڕووبەڕووی یاسا دەکرێتەوە و داوا لە تەواوی لایەنە سیاسیەکان و هاونیشتمانیانیش دەکات پەنا نەبەنە بەر تووندوتیژی لەکاتی بانگەشەی هەڵبژاردن.