سەبارەت بە بەڕێوەبردنی غەززە ئەمریکا یاسایەک بۆ ئەنجوومەنی ئاسایش ئامادە دەکات

ئاڤا نیوز

ئەمریکا ڕەشنووسێک سەبارەت بە غەززە ئامادە دەکات کە تیایدا ئەرکێکی فراوان بە ئەمریکا و وڵاتانی بەشداربوو دەدات بۆ بەڕێوەبردنی غەززە و دابینکردنی ئاسایش. بەجۆرێک ئەرکەکە تا کۆتایی ساڵی 2027 دەخایەنێت.

بڵاوکراوەی فەرمی: بەگوێرەی ماڵپەری ئەکسیۆس، ئەمریکا ڕەشنووسی بڕیارنامەیەکی بۆ ئەندامانی ئەنجوومەنی ئاسایشی نەتەوەیەکگرتووەکان ناردووە بۆ دامەزراندنی هێزێکی نێودەوڵەتیی لە غەززە لانیکەم بۆ ماوەی دوو ساڵ بێت، تێدا دەسەڵات بە واشنتن و وڵاتانی دیکە داوە بۆ بەڕێوەبردنی غەززە لەو ماوەیەدا، هاوکات بەگوێرەی ڕەشنووسەکە ئەرکێکی فراوان بە ئەمریکا و وڵاتانی بەشداربوو دەدرێت بۆ بەڕێوەبردنی غەززە و دابینکردنی ئاسایش تا کۆتایی ساڵی 2027 و ئەگەری درێژکردنەوەی ماوەکەش لە ئارادایە.

ئەوەی لەبارەیەوە دەگوترێت: بەرپرسێکی ئەمریکی بە ئەکسیۆس دەڵێت، ئەو ڕەشنووسە بنەمای دانوستانەکان پێکدەهێنێت کە لە چەند ڕۆژی داهاتوودا لەنێوان ئەندامانی ئەنجوومەنی ئاسایشی نەتەوە یەکگرتووەکان ئەنجام دەدرێت، بە ئامانجی ئەوەی لە هەفتەکانی داهاتوودا و یەکەمین قۆناغی سەربازی لە غەززە جێگیر بکرێت.

ئەمەش بزانە: بەپێی ئەو زانیاریانەی پێشتر بەدەست ئەکسیۆس گەیشتوون، وڵاتانی وەک ئەندەنوسیا، ئازەربایجان، میسر و تورکیا ئامادەیی خۆیان دەربڕیووە بۆ بەشداریکردنی هێزەکانیان  لە ناوچەکە.