عێراق چیتر نەوت و بەنزین لە دەرەوە هاوردە ناکات

ئاڤا نیوز

بەپێی نووسراوێک کە واژۆی محەممەد شیاع سوودانی، سەرۆکوەزیرانی عێراقی لەسەرە و ئاراستەی وەزارەتی نەوتی کردووە، ئاگاداری وەزارەتەکەی کردووەتەوە کە چیتر نەوت، بەنزین و گاز لە دەرەوە هاوردە نەکەن.

بڵاوکراوەی فەرمی: لە نووسراوەکەی سوودانی هاتووە، عێراق گەیشتووەتە ئاستی خۆبژێوی لە بەرهەمهێنانی ناوخۆیی بەنزین، نەوت و گاز، بۆیە پێویست ناکات چیتر ئەم پیداویستییانە لە دەرەوە هاوردە بکرێن.

زانیاریی زیاتر: حکومەتی عێراق دەڵێت، لە سێ ساڵی ڕابردوودا، چەندین پاڵاوگەی نەوتی نوێی بەگەڕخستووە و ئەمەش یارمەتیدەر بووە لە گەیشتن بە "خۆبژیوی" و بگرە زیاتر لە پێداویستی ناوخۆییش بەرهەم دەهێنرێت. 

حکومەتی عێراق فەرمانی کردووە، بریکاری دابەشکردن و کۆمپانیای دابەشکردن، بەرهەمە نەوتییەکانی بەکارهێنانی ناوخۆ کۆنتڕۆڵ بکەن هاوکات بڕی بەرهەمهێنراوی زیادە هەناردەی دەرەوە بکەن.