کۆبوونەوەی ئەنجوومەنی وەزیرانی عێراق کۆتاییهات

ئاڤا نیوز


کۆبوونەوەی ئەنجوومەنی وەزیرانی عێراق کۆتاییهات و مووچەخۆرانی هەرێمی کوردستان چاوەڕوانی یەکلاکردنەوەی پرسی مووچەی مانگی نۆیان دەکرد، بەڵام لە کۆبوونەوەکە باسی مووچە نەکرا.

چیرۆکی سەرەکی: دوانیوەڕۆی ئەمڕۆ سێشەممە کۆبوونەوەی ئاسایی ئەنجوومەنی وەزیرانی عێراق بە سەرپەرشتی محەممەد شیاع سوودانی بەڕێوەچوو، هەر چەندە لە بڕگەکانی کۆبوونەوەکە پرسی ناردنی مووچەی فەرمانبەرانی هەرێمی کوردستانی تێدا نەبوو، بەڵام چاوەڕوان دەکرا هاوشێوەی کۆبوونەوەکانی ڕابردوو لە کۆتاییدا سوودانی فەرمانی ناردنی مووچە ئاراستەی تەیف سامی، وەزیری دارایی عێراق بکات. 


زانیاریی زیاتر: پێشتر ئاڤا باسی لەوەکردبوو کە ئەگەر هاتوو ئەمڕۆ چارەنووسی مووچە یەکلای نەکرێتەوە ئەوا مووچەی مانگی نۆ پێش هەڵبژاردن دابەش ناکرێت. 

 

ئەوەی پێویستە بیزانیت؛ ئەنجوومەنی وەزیرانی عێراق پلانی کشتوکاڵی زستانە بۆ چاندنی 4.5 ملیۆن دۆنم گەنم بە بەکارهێنانی ئاوی سەرزەوی و ژێرزەوی و سیستمی ئاودێریی نوێ پەسەند کرد، بڕیاریشی دا وەزارەتی بازرگانی نابێت "هیچ بڕێک گەنم لە دەرەوەی پلانی کشتوکاڵی دیاریکراوی وەزارەتی کشتوکاڵ چێنرابێت وەربگرێت".

خاڵە نەرێنییەکان؛ ئەم بریارە زۆر مەترسیدارە بۆ کورد بە بەتایبەت بۆ جووتیارانی کەرکووک چونکە: بەپێی ئەم بریارە ئەمساڵ هیچ بەرهەمێکی گەنمانیان لێ وەرناگیرێت بەو پێیەی زۆربەی زەوییەکانی کورد لەو ناوچانە لە دەرەوەی پلانی کشتوکاڵییە.