وەزیری پەروەردە: دوو ملیار دینار بۆ خوێندنی کوردی لە کەرکووک خەرج کراوە

ئاڤا نیوز

 

وەزیری پەروەردە دەڵێت، "کەرکووک لە ناو چەقی پرۆژە ستراتیژییەکانی کەرتی پەروەردەیەدایە، بۆ ئەو مەبەستەش حکومەتی هەرێمی کوردستان دوو ملیار دیناری بۆ خوێندنی کوردی لە کەرکووک خەرج کردووە".

 

چیرۆکی سەرەکی: ئەمرۆ سێشەممە 04-11-2025، ئالان حەمەسەعید، وەزیری پەروەردەی هەرێمی کوردستان بۆ گوێگرتن لە داوکارییەکانی بەڕێوەبەرایەتیی گشتیی خوێندنی کوردی لە کەرکووک سەردانی شارەکەی کرد و لەگەڵ سەرپەرشتیاری پەروەردەکە کۆبووەوە.

 

لێدوانی فەرمی: ئالان حەمەسەعید، وەزیری پەروەردە ڕایگەیاند: لە کابینەی نۆیەمدا کۆمەڵێک کاری گرنگ بۆ کەرکووک کراوە و دەرەنجامی پاڵپشتییەکانی سەرۆکوەزیران مەسرور بارزانی وای کردووە هەزار و 500 قوتابی لە خوێندنی عەرەبییەوە بگەڕێنەوە بۆ خوێندنی کوردی، چونکە حکومەت پشتگیریی تەواوی خوێندنی کوردی دەکات.

 

زانیاریی زیاتر: بە گوتەی ئالان حەمەسەعید، هەزار و 33 مامۆستا لە خوێندنی کوردی لە کەرکووک بوونەتە گرێبەست. لەبارەی ژمارەی قوتابیانی خوێندنی کوردی لە کەرکووک، وەزیری پەروەردە دەڵێت، "ژمارەیان زیاترە لە 100 هەزار قوتابی".

 

ئالان حەمەسەعید دەشڵێت، "کابینەی نۆیەمی حکومەتی هەرێمی کوردستان بە بەهای زیاتر لە دوو ملیار دینار پێداویستیی بۆ خوێندنی کوردی لە کەرکووک دابین کردووە، ئەمە جیا لە دامەزراندنی ژمارەیەک سەرپەرشتیاری پەروەردەیی.