شۆفێرێکی تەکسی 20 هەزار دۆلاری لێ ون دەبێت و منداڵێکی خاوەنپێداویستی تایبەت بۆی دەدۆزێتەوە

ئاڤا نیوز

 

لە ڕووداوێکی جیاوازدا لە شاری هەولێر، دوای ئەوەی شۆفێرێکی تەکسی بڕی دوو دەفتەر دۆلاری (20 هەزار دۆلار) لێ ون دەبێت، بە هەوڵی هێزەکانی پۆلیس تەواوی پارەکە بۆ خاوەنەکەی گەڕێندرایەوە.

 

چیرۆکی سەرەکی؛ ڕووداوەکە ڕۆژی 27ی تشرینی یەکەم (مانگی 10) ڕوویداوە، کاتێک شۆفێرێکی تەکسی بە ناوی "هەڵۆ" جانتایەکی پڕ لە لیرەی تورکی، کە بەهاکەی نزیکەی 20 هەزار دۆلار بووە، پێسپێردراوە بۆ ئەوەی بیگەیەنێتە بازاڕی زێڕینگرانی هەولێر.

 

چی ڕووی دا؟ لە کاتی ڕۆشتنیدا، لە ترافیکلایتی شەقامی شۆڕش (60 مەتری)، شوفێرەکە بۆ ماوەیەک دەوەستێت. لەو کاتەدا کەسێک لێی نزیک دەبێتەوە و پرسیاری ناونیشانێکی لێدەکات. هەڵۆ بۆ یارمەتیدانی ئەو کەسە، لە ئۆتۆمبێلەکەی دادەبەزێت، بەڵام بەبێ ئاگاداری خۆی، جانتاکەی لێ دەکەوێتە خوارەوە.

 

دوای ئەوەی شۆفێرەکە شوێنەکە جێدەهێڵێت، یەکێک لەو منداڵانەی کە لەسەر ترافیکلایتەکان کار دەکات و خاوەن پێداویستی تایبەتە (نابیست و نابێت)، جانتاکە دەدۆزێتەوە. کاتێک جانتاکە دەکاتەوە، بڕێکی زۆر لیرەی تێدا دەبینێت. منداڵەکە، کە لە بەهای پارەکە تێناگات، لیرەکان هەڵدەگرێت و جانتاکە فڕێ دەدات.

 

دواتر، منداڵەکە ڕوو لە نووسینگەیەکی ئاڵوگۆڕی دراو دەکات و بە ئاماژە داوا لە خاوەنەکەی دەکات کە بزانێت ئەو پارانە چین و نرخێکیان هەیە یان نا. بەڵام خاوەنی نووسینگەکە، تەنها بڕی 10 هەزار دیناری عێراقی پێدەدات و تەواوی لیرەکان بۆ خۆی هەڵدەگرێت.

 

ئەوەی پێویستە بیزانیت؛ لە لایەکی ترەوە، شۆفێرە تەکسییەکە دوای ئەوەی بە ونبوونی پارەکە دەزانێت، هێزەکانی پۆلیس ئاگادار دەکاتەوە. تیمەکانی نەهێشتنی تاوان (موکافەحە) دەستبەجێ دەست بە لێکۆڵینەوە دەکەن و لە ڕێگەی کامێراکانی چاودێرییەوە، وردەکاری ڕووداوەکە ئاشکرا دەکەن. دوای بەدواداچوون، هێزەکان دەگەنە نووسینگەی ئاڵوگۆڕی دراوەکە  و دراو و لیرەکان وەردەگرنەوە و ڕادەستی خاوەنەکەی دەکەنەوە.