لە ئاکرێ زاوایەک ئاهەنگی هاوسەرگیرییەکەی دەگۆرێت بۆ تراژیدیا و مەرگ

ئاڤا نیوز

 

لەنێو خۆشی و شادی ئاهەنگی هاوسەرگیرییەکەیاندا، زاوایەک لە ئاکرێ لەپڕ هەستی بە لەدەستدانی هێزی جەستەی کرد و دوای دوو مانگ لە مانەوە لە نەخۆشخانە، دواجار کۆچی دوایی کرد و چیرۆکێکی خەمگینی لەدوای خۆی بەجێهێشت.

 

چیرۆکی سەرەکی؛ ڕۆژی 14ی مانگی ئەیلوولی ئەمساڵ، لە ئاکرێ میهران هەرکی، ئەو گەنجەی کە بە هەزاران هیوا و ئاواتەوە ئامادەکاری بۆ چوونە نێو ژیانی هاوبەشی دەکرد، لە کاتی ئاهەنگی گواستنەوەیدا، تووشی دۆخێکی تەندروستیی نائاسایی بوو. لە کاتێکدا کە لەگەڵ بووکەکەی پێکەوە دەڕۆشتن، میهران هەستی بە بێهێزییەکی زۆر کرد و تەنها توانی بە هاوسەرەکەی بڵێت: "دەستەکانم بە تووندی بگرە، چونکە هێزی ڕۆیشتنم نەماوە."

 

چی ڕووی دا؟ ئەمە دوایین وتەی میهران بوو پێش ئەوەی بە تەواوی لە هۆش خۆی بچێت و بکەوێتە سەر زەوی. بەر لەوەی بە تەواوی هۆشی لەدەست بدات، ئەڵقەی هاوسەرگیرییەکەی لە پەنجەی داکەند و دایە دەستی هاوسەرەکەی و پێی وت: "ئەگەر شتێکم لێهات، با ئەمە وەک ئامانەت و یادگارییەک لە نێوانماندا بمێنێتەوە."

 

میهران بەپەلە گەیەندرایە نەخۆشخانە و لە سەنتەری چارەسەری گورچیلە خرایە ژێر چاودێریی پزیشکییەوە. پشکنینەکان دەریانخست کە تووشی هەوکردن (ئیلتیهاب)ێکی زۆر توند بووە کە سەرجەم دەمارەکانی جەستەی گرتووەتەوە و بەو هۆیەوە توانای جووڵە و ڕۆیشتنی لەدەست داوە.

 

زانیاریی زیاتر؛ سەرەڕای هەوڵی پزیشکەکان و خستنە ژێر چاودێریی چڕ، وێڕای ئەوەی هاوسەرەکەی بۆ ساتێکیش جێی نەدەهێشت و بە هیوای چاکبوونەوەی بوو، بەڵام دوای نزیکەی دوو مانگ ململانێ لەگەڵ نەخۆشییەکە، میهران هەرکی کۆچی دوایی کرد.

 

ئەو ماڵەی کە بڕیار بوو ببێتە لانکەی ژیانە نوێیەکەیان، هەرگیز میهران و هاوسەرەکەی پێکەوە تێیدا نەژیان، و ئەڵقەکەی بووە تەنها یادگارییەک لە چیرۆکێکی خۆشەویستی کە بە تراژیدیایەکی گەورە کۆتایی هات.