بەهۆی کەوتنەخوارەوەی فڕۆکەیەک لە ئەمریکا حەوت کەس گیانیان لەدەست دا

ئاڤا نیوز

 

فڕۆکەیەکی کارگۆ [ ئەو فڕۆکانە تایبەتن بە گواستنەوەی شتومەک] ماوەیەکی کەم دوای بەڕێکەوتن لە فڕۆکەخانەی لۆوڤڵ لە ویلایەتی کنتاکی لە ئەمریکا، کەوتەخوارەوە، یەک پارچە بوو بە ئاگر و بەر چەندین باڵەخانە کەوت، بەهۆی ڕووداوەکەوە حەوت کەس گیانیان لەدەست دا و 11ی دیکە بریندار بوون.

 

لێدوانی فەرمی: ئێندی بیشێیر، فەرمانڕەوای ویلایەتی کنتاکی ڕایگەیاند: ماوەیەکی کەم دوای بەڕێکەوتنی، فڕۆکەکە کەوتووەتە خوارەوە و تیمی فڕۆکەوانیی فڕۆکەکە 28 کەس بووە و دووانیان ونن. ئەو دەشڵێت، "برینداران گوازراونەتەوە نەخۆشخانە و چارەسەری وەردەگرن". 

 

زانیاریی زیاتر؛ لە دیمەنەکاندا دەبینرێت ماوەیەکی کەم دوای بە ڕێکەوتن، ئاگر لە بزوێنەری فڕۆکەکە دەکەوێتەوە، دوای ئەوەی بەر باڵەخانەیەک دەکەوێت، یەک پارچە دەبێت بە ئاگر، دواتر هەر بەم شێوەیە سەدان مەتر دەڕوات و بەر دەیان باڵەخانەی نزیک لە فڕۆکەخانەکە دەکەوێت، بەم جۆرەیش ئاگر زۆربەی ناوچەکە دەگرێتەوە و زیانی زۆر بە چەندین شوێن دەگات.

 

ئەمەش بزانە؛ فڕۆکەکە لە جۆری (MD-11)یە، 34 ساڵە خراوەتە کار و لە 2006ەوە کراوە بە فڕۆکەی کارگۆ، بە خێرایی 340 کیلۆمەتر خۆی کێشاوە بە باڵەخانەکاندا.

 

لە لایەکی دیکەوە: دوای ڕووداوەکە، فڕۆکەخانەکە کە سێیەم چڕترین فڕۆکەخانەی کارگۆیە لە ئەمەریکا، بە شێوەیەکی کاتی بە ڕووی گەشتە ئاسمانییەکاندا داخراوە.