مەسرور بارزانی: قۆناغێکی نوێ لە کوردستان هاتووەتە ئاراوە و پێی دڵخۆشم

ئاڤا نیوز

 

سەرۆکوەزیران مەسرور بارزانی لەکاتی دانانی بەردی بناغەی (ڕێڕەوی ژیان) ڕایگەیاند، "ئەوەی منی دڵخۆش کردووە دروستبوونی ئەو متمانەیە کە خەڵک بە حکومەت هەیەتی، هەروەها ئەو پەیوەندییە تەندروستەی لەنێوان کەرتی تایبەت و حکومەت دروست بووە".

 

چیرۆکی سەرەکی؛ ئەمڕۆ چوارشەممە 5-11-2025، سەرۆکوەزیران مەسرور بارزانی بەردی بناغەی پڕۆژەی "ڕێڕەوی ژیان" لە هەولێر دانا؛ پرۆژە گەورەکە شوێنی کۆبوونەوەی ئاو و ئاوەڕۆی چەند گەڕەکێک، بۆ ناوچەیەکی جوان و گەشتیاریی و سەرنجڕاکێش لە هەولێر دەگۆڕێت.

 

لێدوانی فەرمی؛ سەرۆکوەزیرانی کوردستان ڕایگەیاند، "ئەوەی منی دڵخۆش کردووە ئەوەیە دروستبوونی ئەو متمانەیە کە خەڵک بە حکومەت هەیەتی، هەروەها ئەو پەیوەندییە تەندروستەی لەنێوان کەرتی تایبەت و حکومەت دروست بووە. ئەم هاوکاری و پشتیوانییەی  هاوڵاتییانی کوردستان  وا دەکات ئێمە زیاتر پشتئەستوور بین لە دایبینکردنی خزمەتگوزاری زیاتر بە هاونیشتمانیان".

 

ئەوەی پێویستە بیزانیت؛ لە بەشێکی دیکەی وتارەکەیدا سەرۆکوەزیران مەسرور بارزانی گوتی "هەمیشە ئامانجمان ئەوە بووە لە پەرپێدانی شار و پەرەسەندنیان هاوسەنگی هەبێت، بەوەی تەنیا بایەخ بە سەنتەری شارەکان یان تەنیا چەند گەڕەک و ناوچەیەک نەدرێت، هەر بۆیەشە دەبێت جیاوازی گەڕەکەکان کەم بکرێتەوە و لە گەشەکردنی شارەکاندا بەپێی تایبەتمەندی بایەخ بە گشت ناوچەکان بدرێت و لە خزمگوزارییەکانی ژیان وەک یەک سوودمەند بن."