لە بەسرە باندێکی ماددە هۆشبەرەکان ڕووبەڕووی هێزە ئەمنییەکان بوونەوە؛ بریندار هەیە

ئاڤا نیوز

 

لە کاتی ڕاوەدوونانی تۆڕێکی بازرگانیی ماددە هۆشبەرەکان لەناو کێڵگەیەکدا لە ڕۆژئاوای پارێزگای بەسرە، پێنج کارمەندی هێزە ئەمنییەکان برینداربوون، یەکێک لە بریندارەکان باری تەندروستی ناجێگیرە.

 

وێنە گەورەکە: عێراق دەیان ساڵە وەک ڕێڕەوێکی ترانزێتی ماددە هۆشبەرەکان لە ئەفغانستان و ئێرانەوە بۆ ئەوروپا و وڵاتانی کەنداو بەکاردەهێنرێت، لەدوای ساڵی 2003ـەوە بووەتە بەکارهێنەرێکی سەرەکیی جۆرەها ماددە هۆشبەرەکان.

 

زانیاریی بەدەستهاتوو: سەرچاوەیەکی ئەمنی لە پارێزگای بەسرە بە ئاڤا میدیای ڕاگەیاند، هێزێکی هاوبەش لە بەڕێوەبەرایەتیی نەهێشتنی تاوان و فەوجی "سوات" بەرەبەیانیی ئەمڕۆ چوارشەممە، لە کاتی جێبەجێکردنی فەرمانی دەستگیرکردن بۆ گرووپێک کە گومانی ئەوەیان لێدەکرا ئەندامی "تۆڕێکی بازرگانی و دابەشکردنی ماددە هۆشبەرەکان" بن، ڕووبەڕووی تەقەکردن بوونەتەوە.

 

چی ڕوویدا: ئەم تۆڕە، کێڵگەیەک لە ناوچەی خۆر زوبێر لە ڕۆژئاوای بەسرەی وەک شوێنێکی خۆحەشاردان و بارەگا بەکارهێناوە. پێکدادانەکە بووە هۆی برینداربوونی پێنج کارمەند، چواریان لە فەوجی سوات و یەکێکیان لە نەهێشتنی تاوان، کە ئێستا لەژێر چارەسەری پزیشکیدان.

 

لەهەمان کاتدا: هێزەکە توانیویەتی حەوت تۆمەتبار لەناو کێڵگەکە دەستگیر بکات. لەناو کێڵگەکەدا، دوو ژنی سووریش دۆزرانەوە کە بە شێوەیەکی نافەرمی نیشتەجێ بوون.

 

ئەوەی پێویستە بیزانیت: تەقەکردنەکە بووە هۆی ئاگرکەوتنەوە لەناو کێڵگەکە، بەڵام تیمەکانی بەرگریی شارستانی توانییان کۆنترۆڵی بکەن و ڕێگە لە بڵاوبوونەوەی بۆ ناوچە کشتوکاڵییەکان بگرن.