بەرپرسێکی شارەوانی: زیاتر لە 275 ملیار دینار بۆ 100 مەتریی سلێمانی خەرج کراوە

ئاڤا نیوز

سێ بەشی کارەکانی شەقامی 100 مەتریی سلێمانی تەواو بووە و ڕۆژانی داهاتوو بەشێکی ڕێگاکە بە ڕووی هاووڵاتیاندا دەکرێتەوە، ئاڤا زانیاریی ورد لەبارەی خەرجکردنی پارە بۆ ئەو پڕۆژەیە بڵاودەکاتەوە.

چیرۆکی سەرەکی: پڕۆژەی شەقامی 100 مەتریی سلێمانی ساڵی 2012 دیزاینی بۆ کراوە، بەڵام بەهۆی ململانێکانەوە نەتوانرا پڕۆژەکە جێبەجێ بکرێت، تەنانەت بڕی 150 ملیار دیناریشی بۆ خەرج کرا، بەڵام پارەکە دیارنەما. بۆیە لە ڕۆژی 11-07-2020 سەرۆکوەزیران مەسرور بارزانی، بەردی بناغەی پڕۆژەکەی دانا، هاوکات بڕی 400 ملیار دیناری بۆ تەرخانکرد و دەست بە جێبەجێکردنی کرا.

ئەوەی پێویستە بیزانیت: درێژیی شەقامەکە 37 کیلۆمەترە، 78%ـی پڕۆژەکە تەواو بووە، 78 کیلۆمەتری شەقامەکە لە چەند ڕۆژی داهاتوودا بەڕووی هاووڵاتیاندا دەکرێتەوە، کە تاسڵوجە بە شەقامی تانجەڕۆ دەبەستێتەوە، هاوکات لە ڕێگەی بەرزەپردێکەوە شەقامەکە دەبەستێتەوە بە گەڕەکی بەکرەجۆ.

لێدوانی فەرمی: ئەندازیار نزار تەمەر، بەڕێوەبەری گشتیی پلان و بەدواداچوون لە وەزارەتی شارەوانی بە ئاڤای ڕاگەیاند: کۆمپانیای جێبەجێکاری پڕۆژەکە بڕی 275 ملیار و 103 ملیۆن و 932 هەزار و 639 دیناری بە 17 پێشینە وەرگرتووە، ئەمەش دەکاتە 60%ـی کۆی گشتیی پارەکە. لەگەڵ ئەوەشدا بڕی 13 ملیار و 367 ملیۆن و 523 هەزار دیناری لە بارمتەی یاسایی پڕۆژەکە بۆ گەڕاوەتەوە کە دەکاتە 75% پارەکە.

زانیاریی زیاتر: شەقامی 100 مەتری سلێمانی بەپێی ستانداردی جیهانی دروستکراوە، لە شەقامەکە یەک ئۆڤەرپاس، پێنج ئەندەرپاس، یەک بەرزەپرد، حەوت یەکتربڕی دوو ئاستی و 67 ئاوبەری کۆنکرێتی هەیە، چوار سایدی هاتن و چوون بە پانی 21 مەتر و سایدێکی خزمەتگوزاری 10 مەتری هەیە، هەر لاینێکی شەقامەکە سێ مەتر پانە و پڕۆژەکە لەلایەن کۆمپانیای قەیوانەوە جێبەجێ دەکرێت.

بۆچی گرنگە: بە تەواوبوونی پڕۆژەکە قەرەباڵغی و کێشەکانی هاتووچۆ لەناو شاری سلێمانی نامێنن و هاتووچۆ ئاسانتر دەکات، جوڵەی بازرگانی و ئابووری دەخاتە شارەکەوە.