شاندێکی هەرێمی کوردستان بۆ پرسی گەنم دەچێتە بەغدا

ئاڤا نیوز

بڕیارە دوای جەژن شاندێکی وەزارەتی کشتوکاڵ سەردانی بەغدا بکات و لەگەڵ لایەنە پەیوەندیدارەکان کۆببێتەوە، بە ئامانجی وەرگرتنی سەرجەم گەنمی جووتیاران.

وێنە گەورەکە: ئەمساڵ بەهۆی زۆری بارانبارین و پاڵپشتی حکومەت بۆ جووتیاران، پێشبینی دەکرێت بەرهەمی گەنم زۆر بێت و  ژمارەی پێوانەیی لە 10 ساڵی ڕابردوودا تۆمار بکات.

بۆچی گرنگە: جووتیاران ترسیان لا دروست بووە حکومەتی عێراق هەموو بەرهەمەکە وەرنەگرێت و لە ناوخۆش ساغنەبێتەوە، بۆیە لە ئێستاوە حکومەتی هەرێمی کوردستان دەیەوێت ئەم کێشە چاوەڕوانکراوە چارەسەر بکات.

لێدوانی فەرمی: د. زێدان محەممەد، بەڕێوەبەری گشتیی پلاندانان لە وەزارەتی کشتوکاڵ بە ئاڤا نیوزی گوت: چوونی شاندەکە لەسەر ڕاسپاردەی سەرۆکوەزیران بارزانییە، بە ئامانجی گەیشتن بە ڕێککەوتن بۆ وەرگرتنی سەرجەم گەنمی جووتیاران.

ژمارەکان وادەڵێن: بەپێی ڕووپێوی سەتەلایتی، لە هەرێمی کوردستان دوو ملیۆن و 900 هەزار دۆنم بە گەنم داچێنراوە، پێشبینی دەکرێت بەرهەمەکەی نزیکەی یەک ملیۆن و 500 هەزار تۆن بێت.

زانیاریی تایبەت: سەرەتای مانگی پێنج بڕیاری کۆتایی لەبارەی بڕی وەرگرتنی گەنم دەدرێت، پێش ئەم وادەیە هەرێمی کوردستان دەیەوێت پشکی خۆی یەکلا بکاتەوە.

ئەوەی پێویستە بیزانیت: ئەمساڵ حکومەتی عێراق شەش ملیۆن تۆن گەنم وەردەگرێت و نرخی هەر تۆنێک 850 هەزار دینارە.