نوری مالیکی: پێکهێنانی حکومەتی داهاتووی عێراق سەخت دەبێت

ئاڤا نیوز

سەرۆکی هاوپەیمانیی دەوڵەتی یاسا ڕایدەگەیێنێت، ئەگەر "چوارچێوەی هەماهەنگی" داوای لێبکات ببێتە سەرۆکوەزیران، ئەوا ئامادەیە و لە ئەرکەکە پاشگەز نابێتەوە. هاوکات، مالیکی پێشبینی خۆی لەبارەی پێکهێنانی حکومەتی داهاتوو کرد و ڕایگەیاند، "پێکهێنانی حکومەت سەخت دەبێت".

 

وێنە گەورەکە: بڕیارە سێشەممەی داهاتوو 11ـی 11، هەڵبژاردنی خولی شەشەمی پەرلەمانی عێراق بەڕێوەبچێت، چاوەڕوان دەکرێت تا ڕادەییەک گۆڕانکاری لە نەخشەی سیاسیی عێراق ڕووبدات.

 

لێدوانی فەرمی؛ نوری مالیکی، سەرۆکی هاوپەیمانیی دەوڵەتی یاسا لە چاوپێکەوتنێکدا ڕایگەیاند، "ئەرکی ئێستا نەهێشتنی بێئومێدی و گێڕانەوەی چالاکییە بۆ پڕۆسەی سیاسی". لە وەڵامی پرسیارێکدا دەربارەی ئەگەری کشانەوەی هاوپەیمانێتییەکەی لە ئەگەری نەمانی خۆی لە پۆستەکە، مالیکی وتی: "ئەمە نە بەدەستی منە و نە بەدەستی ئەوان، بەڵام ئەگەر برایان لە دەوڵەتی یاسا یان لە چوارچێوەی هەماهەنگی بڕیاریان دا من کاندید بکەن، پابەند دەبم."

 

لەلایەکی دیکەوە: لەبارەی پێکهێنانی حکومەتی داهاتوو، مالیکی پێشبینی دەکات پێکهێنانی حکومەتی داهاتوو سەخت بێت، تەنانەت ڕەنگە بگاتە ئاستی "سێیەکی پەکخەر". ئەمەش پێچەوانەی هەندێک پێشبینییە کە دەڵێن حکومەت زووتر پێکدەهێنرێت.

 

لەهەمان کاتدا: مالیکی پێیوایە کێشە ناوخۆیی و دەرەکییەکان و ئاڕاستە جیاوازەکان دۆخەکە ئاڵۆز دەکەن. بۆ پێکهێنانی حکومەت، دەبێت گەورەترین کوتلەی پەرلەمانی لە پێکهاتەی زۆرینەدا هەبێت تا کاندیدەکەیان بۆ سەرۆکوەزیران دەستنیشان بکرێت.