سەرۆکوەزیران مەسرور بارزانی بەنداوی دوین بەسەردەکاتەوە

ئاڤا نیوز

پێشنیوەڕۆی ئەمڕۆ پێنجشەممە  سەرۆکوەزیران مەسرور بارزانی کارەکانی پڕۆژەی بەنداوی دوینـی لە سنووری هەولێر بەسەرکردەوە، کە ڕێژەی 15٪ـی کارەکانی تەواو بووە.

 

وێنە گەورەکە: لەپێناو مسۆگەرکردنی ئاسایشی ئاو و ڕووبەڕووبوونەوەی گۆڕانی کەشوهەوا و گرنگیدان بە کشتوکاڵ و ئاژەڵداری، کابینەی نۆیەمی حکومەتی هەرێمی کوردستان گرنگی تایبەتی بە بەهێزکردنی ژێرخانی ئاو داوە و ژمارەیەک پۆند و بەنداوی دروست کردووە، ژمارەیەکیش لە باری جێبەجێکردنن.

 

لێدوانی فەرمی: سەرۆکوەزیران مەسرور بارزانی لەبارەی پڕۆژەی بەنداوی دوین گوتی، "ڕۆڵێکی باشی لە گلدانەوەی ئاو دەبێت."

 

ئەمەش بزانە: بەنداوی دوین توانای گلدانەوەی 100 مليۆن مەتر سێجا ئاوی هەيە و ڕووبەڕی چوار کيلۆمەتر چوارگۆشە بە ئاو دادەپۆشێت. بەنداوەکە بە شێوازی کۆنکرێتی (RCC) دروست دەکرێت و 75 مەتر بەرز دەبێت و لە بەرزترین ئاستیدا 320 مەتر درێژ دەبێت.

 

خاڵە ئەرێنییەکان: ئەم بەنداوە دەبێتە پاڵپشتی زەوییە کشتوکاڵییەکانی پارێزگای هەولێر و ئاستی ئاوی ژێرزەوی بەرز دەکاتەوە. بە هەڵکەوتەی لەگەڵ قەڵای دێرینی دوین، بەنداوەکە دیمەنێکی جوان بە ناوچەکە دەبەخشێت و دەبێتە شوێنێکی گەشتیاری، هەروەها ناوچەکە دەگۆڕێت بۆ ناوەندێکی گەشەسەندووی ڕاوەماسی کە سوودێکی گرنگی ئابووری هەیە بۆ دانیشتووانی نزیک لە بەنداوەکە.