مەسرور بارزانی: جێبەجێکردنی پڕۆژەمان بەلاوە گرنگە نەوەک بیرکردنەوەی خاکفرۆشان

ئاڤا نیوز

سەرۆكوەزیران مەسرور بارزانی دەڵێت، "لە جێبەجێكردنی پڕۆژەكان تەنیا ئاسوودەیی و خزمەتكردنی خەڵكی كوردستانمان لا مەبەستە، بۆچوونی خۆفرۆش، خاكفرۆش، بەكرێگیراو لەلام گرنگ نییە."

چیرۆکی سەرەکی: لەمیانی بەسەركردنەوەی بەشی دووەمی پرۆژەی فریاگوزاریی ئاوی خێرای هەولێر و پێشوازیلێكردنی لەلایەن خاوەنی گرووپی كۆمپانیاكانی هێمن گرووپ، لایەنی جێبەجێكاری پرۆژەكە، سەرۆكوەزیران مەسرور بارزانی قسەی بۆ دەزگاكانی ڕاگەیاندن كرد و وەڵامی پرسیاری ڕۆژنامەنووسانی دایەوە.

لێدوانی فەرمی: سەرۆکوەزیران مەسرور بارزانی ڕایگەیاند، جێگەی دەستخۆشییە كە سەرجەمی كارەكانی پڕۆژەی فریاگوزاریی خێرای ئاوی هەولێر، بە ماوەیەكی كورت و بە هێز و توانای دەستی كاری ناوخۆیی و لەلایەن كۆمپانیایەكی ناوخۆیی جێبەجێكراوە كە خزمەتێكی زۆری هەولێر و هەموو كوردستان دەكات.

زانیاریی زیاتر: لەبارەی دژایەتیکردنی لەلایەن لایەنەکانی دیکە، سەرۆکوەزیران گوتی، بۆچوونی كەسانی خۆفرۆش، خاكفرۆش، بەكرێگیراو لەلام گرنگ نییە و كێشەی خۆیانە، ئەوەی بە لای منەوە گرنگە؛ دایكە شەهیدێك، ماڵە پێشمەرگەیەك و هاووڵاتیەكی ئاساییی چۆن بیر دەكاتەوە.

دووپاتیشی كردەوە، ئامانجمان ئەوەیە تا 10 ساڵی داهاتوو، كوردستانمان لە هەموو سێكتەرەكان پێشبكەوێت و بچێتە قۆناغێكی باشتر و گەشەسەندووتر.

بەشێكی دیکە لە قسەكانی سەرۆكوەزیران مەسرور بارزانی:

٠ پڕۆژەكە بە تەكنەلۆژیایەكی زۆر پێشكەوتوو كراوە.
٠ سەرجەمی پڕۆژەكە لەڕێگەی كۆمپانیایێكی خۆماڵی جێبەجێ كراوە.
٠ هیوامان ئەوەیە كوردستان لەهەموو سێكتەرەكان پێشبكەوێت.
٠ ئەمساڵ دەرئەنجامی زۆربەی پڕۆژەكان دەركەوتن.
٠ هیوادارم لە سلێمانیش ئەو پڕۆژانە بەو شێوەیە تەواو بكرێن.
٠ ئەم ماوەیە بەشێوەیەكی دیراسەكراو دژایەتیمان دەكرێت و ئابووریمان سنووردار دەكرێت.
٠ هەرچی كردوومانە بە ئەركمان زانیوە، داوا لە هاووڵاتیان دەكەم لە پێشخستنی هەرێمەكەمان و پاراستنی ژینگەی كوردستان هاوكارمان بن.
٠ هیوادارم هاووڵاتیان زێدەڕۆیی لە بەكارهێنانی كارەبا و ئاو نەكەن و هاوكارمان بن.