ئاسایشی سلێمانی ئەمڕۆش گەنجەکەی چەمچەماڵی ئازاد نەکرد

ئاڤا نیوز


هەرچەندە ئاسایشی سلێمانی، بەڵێنی بە خانەوادەی بەشدار جەمال، گەنجە دەستگیرکراوەکەی چەمچەماڵ دابوو کە ئەمڕۆ ئەو گەنجە ئازاد بکەن، بەڵام ئەمڕۆش گەنجەکەیان ئازاد نەکرد و تەنانەت نەیانهێشت باوکیشی بیبینێت.

چیرۆکی سەرەکی: 25 ڕۆژە، ئاسایشی سلێمانی، گەنجێکی تەمەن 25 ساڵەی شارۆچکەی چەمچەماڵ، بە ناوی بەشدار جەمال  کەریم دەستگیرکردووە، دوای 23 ڕۆژ لە دەستگیرکردنی ئەو گەنجە کەسوکارەکەی هیچ سۆراخێکیان نەدەزانی و سەردانی هەر شوێن و دەزگایەکی ئەمنیی سلێمانیان دەکرد، هیچ زانیاری و وەڵامێکیان لەسەر کوڕەکەیان پێنەدەدان، تا دوای ئەوەی ئاڤا میدیا بەدواداچوونی بۆ ئەو کەیسە کرد، ئینجا ئاسایشی سلێمانی بە خانەوادەی ئەو گەنجەیان ڕاگەیاند کە کوڕەکەیان لەلای ئەوان دەستگیر کراوە، بەڵێنیشان پێدابوون کە ئەمڕۆ ئازادی بکەن، کەچی ئەمڕۆش ئازادیان نەکرد.

زانیاریی بەدەستهاتوو: ئەمڕۆ جەمال  کەریم باوکی گەنجە دەستگیرکراوەکە سەردانی ئاسایشی سلێمانی کردووە، لە ئاسایش پێیان گوتووە کوڕەکەت بە هەڵە دەستگیر کراوە، بەڵام دوو ڕۆژی دیکە لەلای ئێمە دەمێنێتەوە، ئینجا ئازادی دەکەین.

زانیاریی تایبەت: هەرچەندە گەنجەکە ئازاد نەکراوە، ئاسایشی سلێمانی ڕێگەیان نەداوە، جەمال  کەریم، کوڕە دەستگیرکراوەکەی ببینێت.

باکگراوند: 25 ڕۆژ لەمەوبەر گەنجێکی دانیشتووەی چەمچەماڵ بە ناوی بەشدار جەمال کەریم، کە لە کارگەی چیمەنتۆی بازیان پاسەوان بووە و لە شوێنی کارەکەی لەلایەن هێزێکی ئەمنیی حیزبی دەستگیر کراوە، ئەو گەنجە برایەکی شەهیدی یەکێتییە و دوو برای دیکەشی پێشمەرگەی یەکێتین.