پەیامێکی تووند لە مەسرور بارزانییەوە لەبارەی مووچە: ساڵی داهاتوو بەهیچ جۆرێک ئەم دۆخە قبووڵ ناکەین

ئاڤا نیوز

سەرۆكوەزیران مەسرور بارزانی ڕایدەگەیێنێت، لە بودجەی 2026، جەخت لە دابینكردنی بودجە دەكەینەوە نەك تەنیا مووچە، و بەهیچ جۆرێكیش قبووڵی ناكەین چیتر مووچەی فەرمانبەرانی هەرێمی كوردستان بە كەموكوڕییەوە ڕەوانە بكرێت.

چیرۆکی سەرەکی: ئێوارەی ئەمڕۆ پێنجشەممە 6-11-2025، سەرۆکوەزیران مەسرور بارزانی لەسەر قەڵای دێرینی هەولێر پێشانگایەکی تایبەت بە ئاشنابوون بە ناسنامەی کورد لەڕێگەی هونەری ڕەسەن و هاوچەرخەوە کردەوە کە دامەزراوەی "کوردستان فاوەندەیشن" پێی هەڵسا بوو. دواتر بەشداری گفتوگۆیەکی لەگەل چەند گەنجێک کرد.

سەرۆكی حكومەتی هەرێمی كوردستان ڕاشیگەیاند، حکومەتی عێراق لە ساڵی 2014ـەوە فشاری ئابووری لەسەر هەرێمی کوردستان دروستکردووە؛ بەپێی سەرژمێری ژمارەی دانیشتوانی هەرێمی کوردستان %14 بووە، بەڵام کەمتر لە 5% بودجە بۆ کوردستان هاتووە.

سەرۆكوەزیرانی هەرێمی كوردستان باسی لەوەشكرد، وەزارەتی دارایی عێراق تەداخولی ورد و درشتی كارە ئابوورییەكانی هەرێمی كوردستان دەكات، پەیوەست بەم بابەتەش، بە سەرۆکوەزیرانی عێراقم وت، لە دەوڵەتی فیدڕاڵی حکومەت ئەو مافەی نییە دەستوەردان لە دابەشکردنی مووچە بکات. 

ئاماژەی بەوەشكرد، بەغدا نەوتی کوردستان دەفرۆشێت و داهاتی ناوخۆش وەردەگرێت، ئەو پارەیەی ئێستا دەینێرن داهاتی خۆمانە و منەتی تێدا نییە.