سەرۆك بارزانی: دەیانەوێت بە ماددەی هۆشبەر خەڵكی كوردستان لەناو ببەن

ئاڤا نیوز

سەرۆك بارزانی دەڵێت، مەترسیدارترین پلان و چەك كە دەیانەوێ لەدژی خەڵكی كوردستان بەكاریبهێنن، بەكارهێنانی ماددەی هۆشبەرە، بۆیە یەكێك لە كارە سەرەكییەكانمان دادگاییكردن و بەسزاگەیاندنی بازرگانانی ماددەی هۆشبەر و ئەو كەسانەیە كە كارخانەی ماددەی هۆشبەریان داناوە چ لە هەرێمی كوردستان بێت یاخود لە عێراق.

چیرۆکی سەرەکی: ئەمڕۆ هەینی، بە ئامادەبوونی سەرۆک بارزانی، پارتی گەورەترین کەرنەڤاڵی بانگەشەی هەڵبژاردنی لە یاریگەی فرەنسۆ هەریری لە هەولێر بەڕێوەبرد، کە زیاتر لە 60 هەزار کەس ئامادەی بوون، سەرۆک بارزانی چەند پەیامێکی ئاراستەی نەیارانی کوردستان و لایەنەکان کرد.

پەیامی فەرمی: سەرۆك بارزانی لە وتارەكەیدا وتی: "هێشتا هەڕەشەی جددی لەسەر هەرێمی كوردستان و عێراق هەیە؛ تیرۆر و بیری تووندڕەوی تەواو نەبووە و لە زۆر شوێن خۆیان ڕێكخستووەتەوە و بەرنامەشیان هەیە بۆ كاری تێكدەری."

سەرۆك بارزانی هۆشداری لە مەترسی بڵاوبوونەوەی ماددەی هۆشبەر دا و ڕایگەیاند، "دوای تیرۆر، مەترسی دووەم ماددەی هۆشبەرە كە بەشێوەیەكی بەرنامە بۆ داڕێژراو، دەیانەوێت خەڵكی كوردستان لەناو ببەن، و خەریكە ماڵی ئێمە وێران بكەن."

دووپاتیشی كردەوە، یەك لە كارە سەرەكییەكانمان ئەوەیە؛ ئەوانەی بازرگانی بە ماددەی هۆشبەر دەكەن و ئەوانەی كارخانەی ماددە هۆشبەرەكانیان داناوە چ لە هەرێمی كوردستان و چ لە عێراق، بدرێنە دادگا و تووندترین سزا بدرێن، چونكە تاوانباری ترسناكن.