عوسمان بایدەمیر و مەزڵووم عەبدی ڕەوشی باکوور و ڕۆژئاوا و پرۆسەی ئاشتی تاوتوێ دەکەن

ئاڤا نیوز

دوای سەردانەکەی بۆ هەرێمی کوردستان و سەردانیکردنی سەرۆک بارزانی و سەرۆکوەزیرانی کوردستان، ئەمڕۆ هەینی عوسمان بایدەمیر، ئەندامی پێشووی پەرلەمانی تورکیا گەیشتە ڕۆژئاوای کوردستان و لەلایەن مەزڵووم عەبدیەوە پێشوازی لێکرا.

وێنە گەورەکە: لە مانگی شوباتی ئەمساڵەوە پرۆسەی ئاشتی لە تورکیا دەستیپێکردووە و پەکەکە کۆنگرەی خۆهەڵوەشاندنەوەی ئەنجامداوە. بەرپرسانی دەم پارتی و سیاسەتمەدارانی کورد لە باکووری کوردستان ئەمجارە بە ئەرێنییەوە دەڕواننە پرۆسەکە.

بڵاوکراوەی فەرمی: مەزڵووم عەبدی، فەرماندەیی گشتی هێزەکانی سووریای دیموکرات لە هەژماری خۆی لە تۆڕی ئێکس بڵاویکردوەتەوە، "کەیفخۆش بووم بە سەردانی بەڕێز عوسمان بایدەمیر، پەرلەمانتاری پێشووی (هەدەپە). ئێمە ڕەوشی باکوور و ڕۆژهەڵاتی سووریا و پێڤاژۆی ئاشتی لە باکووری کوردستان و تورکیامان باس کرد. دانیشتنێکی باش بوو".

لە بەشێکی دیکەی پەیامەکەی مەزڵووم عەبدی ئەوەش هاتووە، "گرنگیمان دا بە پشتگیریکردنی خەباتی ئاشتی و ئارامی و دەرفەتی چارەسەری سیاسی لە سووریا و ناوچەکە."

ئەوەی پێویستە بیزانیت: عوسمان بایدەمیر، کەسایەتی سیاسی و پارێزەرە، ماوەی 10 ساڵ سەرۆک شارەوانی ئامەد بووە. لە ساڵی 1999ـەوە هاتووەتە ناو کەیسی پارێزەرانی عەبدوڵڵا ئۆجەلان و ئەندامی پەرلەمان بووە لەسەر لیستی هەدەپە.

باکگراوند: دوای ئەوەی لە هەرێمی کوردستان زنجیرەیەک کۆبوونەوەی ئەنجامدا، دوێنێ عوسمان بایدەمیر لە ڕۆژئاوای کوردستان و لە شاری قامیشلۆ سەردانی بارەگای ئەنەکەسەی کرد و ئەمڕۆش سەردانی مەزڵووم عەبدی.