كۆمیسیۆن: نزیكەی 600 هەزار كارتی دەنگدان لەلایەن دەنگدەرانەوە وەرنەگیراونەتەوە

ئاڤا نیوز

كۆمیسیۆنی باڵای هەڵبژاردنەكان ئاشكرای دەكات، نزیكەی 600 هەزار كارتی دەنگدان لە سەرانسەری عێراق لەلایەن دەنگدەرانەوە وەرنەگیراونەتەوە، هاوكات دوو ملیۆن و 800 هەزار كارتی نوێی دەنگدانیان دابەشكردووە كە لەم ماوەی دواییدا دەرچوون.

وێنە گەورەكە: لە هەڵبژاردنی خولی شەشەمی پەرلەمانی عێراق، 21 ملیۆن و 404 هەزار و 291 كەس لە تێكڕای عێراق، مافی دەنگدانیان هەیە، كە یڕیارە ڕۆژی 11ـی ئەم مانگە دەنگدانی گشتی بەڕێوەبچێت، و دوو ڕۆژ بەر لەو وادەیەش، دەنگدانی تایبەت لە 9-11-2025 بەڕێوەدەچێت.

لێدوانی فەرمی: حەسەن هادی، ئەندامی تیمی ڕاگەیاندنی كۆمیسیۆنی باڵای سەربەخۆی هەڵبژاردنەكانی عێراق، لە لێدوانێكی ڕۆژنامەوانیدا ڕایكەیاند، "لەكۆی سێ ملیۆن و 400 هەزار كارتی بایۆمەتری بۆ دەنگدەرانی تازە تۆماركراو، زیاتر لە دوو ملیۆن و 800 هەزار دەنگدەر لە بنكە لاوەكییەكان كارتەكانیان وەرگرتووەتەوە، نزیكەی 600 هەزار كارتی دەنگدانیش ماونەتەوە كە هێشتا لەلایەن خاوەنەكانیان وەرنەگیراوەتەوە."

زانیاریی زیاتر: كۆمیسیۆنی هەڵبژاردنەكان ڕوونیشی كردووەتەوە، هێشتا كات ماوە لەبەردەم وەرگرتنەوەی كارتەكانی دەنگدان، تەنانەت لە ڕۆژی پرۆسەی دەنگدانیش بنكە لاوەكییەكان كراوە دەبن بۆ پێدانەوەی كارتی بایۆمەتری بە دەنگدەران.

گۆشەیەکی دیکەی دیمەنەکە: كۆمیسیۆن ئەو هەواڵانە ڕەت دەكاتەوە كە ڕێگری لە نوێنەرانی سەر بە نەتەوە یەكگرتووەكان كرابێت، چاودێریی پرۆسەی هەڵبژاردن و دەنگدانی تایبەت و گشتی بكەن.

ئەمەش بزانە: تا ئێستا زیاتر لە 800 چاودێری نێودەوڵەتی ناوی خۆیان تۆماركردووە بۆ چاودێریكردنی پرۆسەی هەڵبژاردن، خۆتۆماركردنیش هێشتا بەردەوامە.