ئەمریکا "بەهۆی خراپ مامەڵەکردن" لەگەڵ جووتیارانی سپیپێست بایکۆتی لووتکەی گرووپی 20 دەکات

ئاڤا نیوز

سەرۆکی ئەمریکا دەڵێت بەهۆی "خراپ مامەڵەکردن لەگەڵ جووتیارانی سپیپێست" وڵاتەکەی بەشداریی لووتکەی گرووپی 20 ناکات کە بڕیارە لە ئەفریقای باشوور بەڕێوەبچێت.

 

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند: "هیچ بەرپرسێکی ئەمریکی بەشداری لووتکەی گرووپی 20 لە باشووری ئەفریقا ناکات". هاوکات ترەمپ ئەفریقای باشووری بە پێشێلکردنی مافەکانی مرۆڤ تۆمەتبار کرد، بەتایبەت لەسەر پرسی مامەڵەکردنی وڵاتەکە لەگەڵ جووتیارانی سپیپێست.

 

زانیاریی زیاتر: بڕیاربوو لە جیاتی ترەمپ جەی دی ڤانسی جێگری بەشداری بکات، بەڵام سەرچاوەیەکی ئاگادار لە پلانەکانی ڤانس ڕایگەیاندووە، کە ڤانسیش بەشدار نابێت.

 

ئەمەش بزانە: ترەمپ پێشتر ڕایگەیاندبوو کە بەشداری لووتکەی ساڵانەی سەرکردەکانی وڵاتانی پێشەنگ و گەشەسەندنی ئابووریی جیهان ناکات، بەڵام چاوەڕێ دەکرێت ساڵی داهاتوو لە میامی لە ویلایەتی فلۆریدا ئەمریکا میوانداریکردنی لووتکەی گرووپی 20 بکات.

 

ئەوەی پێویستە بیزانیت: گرووپی 20 ئەو وڵاتانە کۆ دەکاتەوە کە گەورەترین ئابوورییان هەیە لە جیهاندا،  وڵاتانی ئەندام ساڵانە کۆ دەبنەوە بۆ تاوتوێکردنی دەستپێشخەرییە ئابووری، سیاسی و کۆمەڵایەتییەکان، بۆ ئەمساڵ بڕیارە لووتکەکە  لە 22 و 23 ئەم مانگە لە ئەفریقای باشوور بەڕێوەبچێت.