دەنگدانی تایبەت لە عێراق و هەرێمی کوردستان دەست پێ دەکات

ئاڤا نیوز

دوایی کۆتاییهاتنی پڕۆسەی بانگەشەی هەڵبژاردن بۆ پەرلەمانی عێراق، سبەی دەنگدانی تایبەت لە سەرانسەری عێراق بەڕێوەدەچێت. 

چیرۆکی سەرەکی: دوای 37 ڕۆژە لە بانگەشەی حیزب و لایەن و کاندیدە سەربەخۆکان و ناساندنی کارنامەی چوار ساڵی ئاییندەیان بۆ پەرلەمانی عێراق، بەرەبەیانی ئەمڕۆ ئەو وادەیە کۆتاییهات، ڕۆژێک بەر لە دەنگدانی گشتیش دەنگدانی تایبەت بەڕێوەدەچێت.

لێدوانی فەرمی: مەریوان محەممەد نەجار، بەرپرسی نووسینگەی هەولێری کۆمسیۆنی سەربەخۆی هەڵبژاردنەکانی عێراق، بە ئاڤا میدیای ڕاگەیاند، سبەی یەکشەممە دەنگدانی تایبەت ئەنجامدەدرێت و تەواوی ئامادەکارییەکان کراون و ئامێرەکان لە بنکەکان دانراون.

زانیاریی زیاتر: هەر بەپێی بڕیاری كۆمیسیۆنی باڵای هەڵبژاردنەكان سبەی یەکشەممە دەنگدانی تایبەت دەستپێدەکات بۆ کارمەندی هێزە ئەمنییەکان، ڕۆژی سێشەممەش دەنگدانی گشتیی بەڕێوەدەچێت.

ئەوەی پێویستە بیزانیت: لە هەڵبژاردنی ئەمساڵ، حەوت هەزار و 768 بەربژێر کێبڕکێ لەسەر 329 کورسی پەرلەمانی عێراق دەکەن، کە پێنج هەزار و 520 بەربژێرییان پیاو و دوو هەزار و 248ـیان ژنن، لە کۆی 46 ملیۆنی دانیشتووانی عێراقیش تەنیا نزیکەی 21 ملیۆن دەنگدەر مافی دەنگدانیان هەیە، لەکاتێکدا نزیکەی حەوت ملیۆن کەس ناتوانن بەشداری دەنگدان بکەن، بەهۆی نوێنەكردنەوەی زانیارییەكانیان.