ئەمریکا بەهۆی جەنگی ڕووسیا و ئۆکرانیا یەک ملیۆن درۆن دەکڕێت

ئاڤا نیوز

 

واشنتن لە پلانیدایە لە دوو سێ ساڵی داهاتوودا نزیکەی یەک ملیۆن درۆن بکڕێت، بەرپرسێکی باڵای ئەمریکاش هۆکارەکەی بۆ جەنگی ڕووسیا و ئۆکرانیا دەگێڕێتەوە.

وێنە گەورەکە: ساڵانە ئەمریکا نزیکەی 50 هەزار درۆن لە کۆمپانیاکانی وڵاتەکەی دەکڕێت بەڵام بەهۆی ڕۆڵی درۆنەکان لە یەکلاییکردنەوەی دواهەمین جەنگەکانی ناوچەکە، ئیدارەی ترەمپ بڕیاریداوە ڕێژەی کڕینی درۆنەکان زیاد بکات.

لێدوانی فەرمی: دانیال دریسکۆڵ، بەرپرسی سوپای ئەمریکا لە چاوپێکەوتنێکدا بە ئاژانسی ڕۆیتەرزی ڕاگەیاند، "پلانمان هەیە لە ماوەی دوو بۆ سێ ساڵی داهاتوودا لانیکەم یەک ملیۆن درۆن بکڕین، هەروەها لە ساڵانی دواتردا ساڵانە لە یەک ملیۆنەوە تا چەند ملیۆنێک درۆن دەکڕین و ئەرکی منە ئەمریکا بۆ جەنگی داهاتوو ئامادە بکەم".

هۆکارە زانراوەکان؛ ئەو بەرپرسەی ئەمریکا وتیشی، "لە جەنگی ڕووسیا و ئۆکرانیا بۆمان دەرکەوت درۆنەکان یەکلاکەرەوەن و  ساڵانە هەر یەکەیان چوار ملیۆن درۆن بەرهەم دەهێنن و وڵاتی چینیش توانای هەیە دوو ئەوەندەی ئەو وڵاتانە درۆن بەرهەم بهێنێت".

-درۆنە بچووک و هەرزانەکان سەلماندوویانە کە یەکێکن لە بەهێزترین چەکەکان لە جەنگی ڕووسیا و ئۆکرانیا، بەتایبەتی لەو ناوچانەی بەهۆی سیستمی بەرگرییەوە ئەستەمە بۆ فڕۆکە جەنگییەکان ئۆپەراسیۆن ئەنجام بدەن.