کۆمیسیۆن ڕێکارەکانی تۆمارکردنی سکاڵا لە ڕۆژی دەنگدان بڵاودەکاتەوە

ئاڤا نیوز

کۆمیسیۆنی باڵای سەربەخۆی هەڵبژاردنەکانی عێراق ڕێکارەکانی تۆمارکردنی سکاڵای لە ڕۆژی دەنگدان بۆ هەڵبژاردنی پەرلەمان بڵاوکردەوە و دەڵێت، سکاڵا لەسەر بوونی پێشێلکارییەکان گرنگە بەتایبەتیش سکاڵای ڕەنگی سوور کە دەبێتە هۆی پووچەڵکردنەوەی دەنگدانی وێستگە یان هەر بنکەیەک کە پێشێلکاری گەورەی تێدا کرابێت.

وێنە گەورەکە: سبەی یەکشەممە بە بەشداری ملیۆنێک و 313 هەزار و 859 کەس دەنگدانی تایبەتی هێزە ئەمنییەکان و ئاوارەکان بۆ هەڵبژاردنی پەرلەمانی عێراق دەکرێت، ڕۆژی سێشەممەی داهاتووش بە بەشداری 20 ملیۆن و 63 هەزار 773 کەس دەنگدانی گشتی بەڕێوەدەچێت.

ڕاگەیێنراوی فەرمی: کۆمیسیۆنی باڵای سەربەخۆی هەڵبژاردنەکانی عێراق بڵاویکردەوە، لە هەردوو ڕۆژی دەنگدانی تایبەت و گشتی، دەنگدەر، کاندید، چاودێری حیزب و هاوپەیمانێتییەکان، دەتوانن سکاڵا لەسەر پرۆسەی دەنگدان و جیاکردنەوەی دەستی دەنگەکان تۆمار بکەن، بەڵام نوێنەری ڕێکخراوەکان و میدیاکاران لەگەڵ خەڵکی ناعێراقی (واتە بیانی) ناتوانن سکاڵا تۆمار بکەن.

بەگوتەی کۆمیسیۆن، پێویستە سکاڵاکار بە ناو و واژۆی خۆی سکاڵاکەی بنوسێت و خۆی پێشێلکارییەکەی بینیبێت، بەڕێوەبەری وێستگە یان بنکەی دەنگدانیش پشتیوانی سکاڵاکەی بکات، هەروەها دەبێت لە سکاڵاکەدا بە وردی کات و شوێن و چۆنییەتی پێشێلکارییەکەی بە وردەکاریی تەواوەوە بنوسێت، بەڵگەکانی تایبەت بە سکاڵاکەشی پێویستە هاوپێچ بکات.

زانیاریی زیاتر: هەر بەگوێرەی ڕێنماییەکان و دوای وەرگرتنی سکاڵاکان، کۆمیسیۆن بۆ هەر چەند پارێزگایەک لیژنەی تایبەت پێکدەهێنێت، سکاڵاکانیش دابەش دەبن بۆ سێ جۆر:

سکاڵای زەرد؛ ئەو سکاڵایەیە کە بەڵگەی پێویستی لەسەر نییە و هەر لە سەرەتاوە ڕەتدەکرێتەوە.

سکاڵای سەوز؛ ئەم سکاڵایە لەسەر بوونی پێشێلکاریی لەلایەن کارمەندی کۆمیسیۆن یان بوونی بانگەشە لەناو وێستگەی دەنگدان یانیش هێزە ئەمنییەکانەوە، تۆمار دەکرێت و خودی سکاڵاکە کاریگەری لەسەر ئەنجامەکان نابێت، بەڵام پێویست دەکات ڕێکار بگیرێتەبەر و لێکۆڵینەوە لەو سەرپێچییانە بکرێت.

سکاڵای سوور؛ ئەم جۆری سکاڵایە ئاماژە بۆ پێشێلکارییەک دەکات کە مەترسیدارە و ئەگەر بسەلمێنرێت کە ڕاستە، کاریگەری لەسەر ئەنجامی هەڵبژاردنەکان دەبێت، کاری لەپێشینەش دەدرێت بەم جۆری سکاڵایە و بەدواداچوون و چاودێری تایبەتی ئەم جۆری سکاڵایە دەکرێت.