کۆمیسیۆن بۆ ئاڤا: هەموو بنکەکانی دەنگدانی تایبەت لە هەرێمی کوردستان کراونەتەوە

ئاڤا نیوز

دەستەی هەڵبژاردنەکانی هەرێمی کوردستان لە کۆمیسیۆنی باڵای سەربەخۆی هەڵبژاردنەکانی عێراق ڕایگەیاند، هەموو ئەو بنکانەی بۆ دەنگدانی تایبەت ئامادەکراون، بەبێ کێشە دەنگدان تیایاندا دەستیپێکردووە. 

چیرۆکی سەرەکی: بۆ هەڵبژاردنی خولی شەشەمی پەرلەمانی عێراق، ئەمڕۆ یەکشەممە 9-11-2025، لە کاتژمێر حەوتی بەرەبەیانییەوە پڕۆسەی دەنگدانی تایبەت لە سەرانسەری عێراق دەستیپێکردووە و تا کاتژمێر شەشی ئێوارە بەردەوام دەبێت.

لێدوانی فەرمی: نەبەرد عومەر، بەرپرسی دەستەی هەڵبژاردنەکانی هەرێمی کوردستان بە ئاڤا میدیای گوت: کاتژمێر حەوتی بەیانی هەموو ئەو بنکانەی بۆ دەنگدانی تایبەت ئامادەکرابوون، بەڕووی دەنگدەران کراونەتەوە و لە هەموو بنکەکانیش ئامێرەکانی دەنگدان بێ کێشە کار دەکەن.

زانیاریی زیاتر: 276 هەزار و 613 دەنگدەری پێشمەرگە و هێزە ئەمنییەکان لە چوار پارێزگاکەی هەرێمی کوردستان بەشداری پرۆسەی دەنگدانی تایبەت دەکەن، لە 204 بنکە دەنگ دەدەن، بەمشێوەیە بەسەر پارێزگاکان دابەش بوون:

-  هەولێر: 111 هەزار و 839 دەنگدەر لە 79 بنکە دەنگ دەدەن

-  سلێمانی و هەڵەبجە: 108هەزار و 344 دەنگدەر لە 82 بنکە دەنگ دەدەن

-  دهۆک: 56 هەزار و 430 دەنگدەر لە 43  بنکە دەنگ دەدەن

بە تەنیشت ئەم بابەتەوە: هەر ئەمڕۆ 26 هەزار و 538 ئاوارە لە هەرێمی کوردستان، لە 27 بنکە دەنگ دەدەن و بەمشێوەیە دابەشکراون بەسەر پارێزگاکاندا:

دهۆک: 25 هەزار و 986 دەنگدەر لە 23 بنکە دەنگ دەدەن

هەولێر: 547 دەنگدەر لە سێ بنکە دەنگ دەدەن

سلێمانی: پێنج دەنگدەر لە یەک بنکە دەنگ دەدەن