نەبەرد عومەر: 50%ـی هێزە ئەمنییەکان لە هەولێر بەشدارییان لە دەنگدان کردووە

ئاڤا نیوز

بەرپرسی دەستەی هەڵبژاردنەکانی هەرێمی کوردستان ڕایگەیاند: پڕۆسەی دەنگدانی تایبەت بەشێوەیەکی ئاسایی و بێ گرفت بەردەوامە و ڕێژەی بەشداریکردنی هێزە ئەمنییەکانیش لە هەولێر تاوەکو کاتژمێر 11, گەیشتووەتە 50%. 

چیرۆکی سەرەکی: بەرەبەیانی ئەمڕۆ یەکشەممە، پڕۆسەی هەڵبژاردنی تایبەت لە سەرانسەری عێراق دەستیپێکرد، بەگوێرەی لێدوانی کۆمیسیۆنی باڵای سەربەخۆی هەڵبژاردنەکانیش دەنگدەران بەشێوەیەکی ئاسان و ئاسایی بەردەوامن لە دەنگدان.  

لێدوانی فەرمی: نەبەرد عومەر، بەرپرسی دەستەی هەڵبژاردنەکانی هەرێمی کوردستان لە کۆمیسیۆنی باڵای سەربەخۆی هەڵبژاردنەکانی عێراق ڕاگەیاند: لە هەڵبژاردنی ئەمجارەدا سەرجەم گرفتە تەکنییەکانی چارەسەرکراون، بەهۆی ئەو ئاسانکارییەی کراوە تاوەکو ئێستا 60% هێزە ئەمنییەکان ڕوویان لە بنکەکانی دەنگدان کردووە و بەشێوەیەکی ئاسان بەشداریی لەو پڕۆسەیە دەکەن. 

بەرپرسی دەستەی هەڵبژاردنەکانی هەرێمی کوردستان لە وەڵامی پەیامنێری ئاڤا باسی لەوەش کرد: لە سنووری پارێزگای هەولێر 111 هەزار دەنگدەری تایبەت هەیە، ئێستا لەو ڕێژەیە 50% هێزە ئەمنییەکان بەشدارییان لە دەنگدان کردووە.

لەلایەکی دیکەوە: لەبارەی دروستبوونی گرفت لە بنکەکانی دەنگدان، نەبەرد عومەر باسی لەوەکرد: 958 وێستگەی دەنگدانی تایبەت هەیە، لەسەرەتای دەستپێکردنی پڕۆسەی دەنگدان تەنها چوار وێستگەی گرفتی هونەری هەبوو، دواتر کێشەکان چارەسەر کران.

- تاوەکو کاتژمێر 11 پێش نیوەڕۆ هیچ پێشێلکارییەکی ئاشکرا تۆمار نەکراوە و هیچ کەسێکیش پەیوەندی نەکردووە. 

نوێدەکرێتەوە...