بەرپرسێکی باڵای یەکێتی لە دهۆک وازی لە حزبەکەی هێنا و بووە پارتی

ئاڤا نیوز

 

جێگری یەکەمی لێپرسراوی مەڵبەندی چواری یەکێتی لە دهۆک لە کاردانەوەی داواکارییەکی حزبەکەی بە دەنگدان بە کاندیدی کۆتای ڕەیان کلدانی لە سنووری دهۆک وازی لە یەکێتی هێنا و پەیوەندیی بە پارتییەوە کرد.

 

وێنە گەورەکە؛ بەرپرسانی باڵای یەکێتی بۆیان ڕوونبووەتەوە ناتوانن ڕێژەی پێویست بۆ بردنەوەی کورسی لە سنووری پارێزگای دهۆک بەدەستبهێنن، بۆیە ئەندام و لایەنگرانیان ئاگادارکردووەتەوە کە دەنگ بە کاندیدی کۆتای کریستیانەکان بدەن نەک کاندیدانی یەکێتی.

 

لێدوانی فەرمی؛ بژار شێخ عوبێد، جێگری یەکەمی لێپرسراوی مەڵبەندی چواری یەکێتی لە دهۆک بە ئاڤای گوت، "دوای 36 ساڵ خزمەت وازم لە یەکێتی هێنا، تەنانەت تاوەکو چەند ڕۆژێک پێش ئێستاش ئەو بیرۆکەیە لە مێشکمدا نەبووە، بەڵام لەبەر دوو هۆکار ئەو بڕیارەمدا."

 

هۆکارە زانراوەکان؛ جێگری یەکەمی لێپرسراوی مەڵبەندی چواری یەکێتی گوتیشی، "هۆکاری یەکەم ئەوەیە، بەرپرسانی باڵای حزب داوایان کردووە هەموومان دەنگ بە کاندیدی ڕەیان کلدانی لە دهۆک بدەین لەبری کاندیدانی یەکێتی، کە ئەوەش پێچەوانەی بیروبۆچوونی ئێمەیە و ئیرادەی خۆمان ناگۆڕین، ئێمە کوردین و دەبێت بۆ کوردایەتی شەڕ بکەین."

 

ئەو بەرپرسەی یەکێتی هۆکاری دووەمی وازهێنانەکەی بە گوتەی خۆی بۆ ئەوە دەگەڕێنێتەوە، کە دەڤەری بادینان لەلایەن یەکێتییەوە پشتگوێخراوە و لە بانگەشەی هەڵبژاردن بەرپرسانی باڵای ئەو حزبە سەردانی ناوچەکەیان نەکردووە.