ڕێژەی بەشداری لە دەنگدانی تایبەت; سلێمانی یەکەمە و ڕەسافەی بەغدا دواهەمیینە

ئاڤا نیوز

کۆمیسیۆنی باڵای سەربەخۆی هەڵبژاردنەکان لە عێراق ئاشکرایکرد، تا نیوەڕۆی ئەمڕۆ، ڕێژەی بەشداریی لە دەنگدانی تایبەت لە سەرانسەری عێراق و هەرێمی کوردستان 60% بووە، 78%ی دەنگدەرانی هێزە ئەمنییەکانیش لە پارێزگای سلێمانی تا نیوەڕۆ دەنگیان داوە، بەوەش لە ئاستی عێراق یەکەم بووە.

بڵاوکراوەی فەرمی: کۆمیسیۆنی باڵای سەربەخۆی هەڵبژاردنەکان لە عێراق بڵاویکردەوە: تا نیوەڕۆی ئەمڕۆ، ڕێژەی دەنگدانی هێزە ئەمنییەکان لە سەرانسەری عێراق و هەرێمی کوردستان 60% بووە، 38%ی ئاوارەکانیش دەنگیان داوە.

ئاماژەی بەوەشکردووە، تا نیوەڕۆ زۆرترین ڕێژەی بەشداریی لە دەنگدانی تایبەت لەسەر ئاستی عێراق، لە پارێزگای سلێمانی بووە و 78% بووە، کەمترین ڕێژەی بەشدارییش لە بەشی ڕەسافەی بەغدا بووە و تەنیا 47%ی هێزە ئەمنییەکان تا نیوەڕۆ دەنگیان داوە.

باکگراوند:  ئەمڕۆ یەکشەممە، لە کاتژمێر 7ـی بەیانییەوە پرۆسەی دەنگدانی تایبەت دەستیپێکردووە و یەک ملیۆن و 313 هەزار و 859 کەس لە عێراق و هەرێمی کوردستان مافی دەنگدانیان هەیە.