دایکێک لە دەنگدانی تایبەتدا: هەتا دەنگ نەدەم ناچم تەرمی منداڵەکەم وەربگرمەوە

ئاڤا نیوز

ئەمڕۆ، لەگەڵ دەستپێکردنی پرۆسەی دەنگدانی تایبەت، لە بنکەی دەنگدانی کەمپی ئاوارەکانی شاریا، ئافرەتێک بەشداریی هەڵبژاردنی کرد و ئاماژەی بەوەکردووە منداڵەکەی کۆچی دوایی کردووە و هەتا بەشداریی پرۆسەی دەنگدان نەکات ناچێت تەرمەکەی وەربگرێتەوە.

 

چیرۆکی سەرەکی: زەید تەها، پەیامنێری ئاڤا نیوز، ئاشکرایکرد، ئافرەتێکی ئاوارەی خەڵکی شنگال کە لە کەمپی شاریا دەژی، بەرلەوەی بێت بۆ پرۆسەی دەنگدان هەواڵی ئەوەی پێدراوە کە منداڵەکەی کۆچی دوایی کردووە، بەڵام هەتا بەشداریی پرۆسەی دەنگدان نەکات نەچووە بەدەم رێوشوێنەکانی پرسە و وەرگرتنەوەی تەرمی منداڵەکەی.

 

زانیاریی زیاتر: ئەو دایکە خانەوادەکەی لە ئەڵمانیا دەژین، بەڵام بۆ بەشدارییکردن لە دەنگدان گەڕاوەتەوە بۆ کەمپی شاریا بۆئەوەی بەشداریی لە پرۆسەی دەنگداندا بکات، بەڵام ئاگادارکراوەتەوە کە لە ئەڵمانیا منداڵەکەی کۆچی دوایی کردووە.

 

ئەو ئافرەتە بە دڵێکی پڕ و چاوی پڕ لە فرمێسک دووپاتی کردووەتەوە، سەرەڕای ئەو بارودۆخە هەر نەمهێشت دەنگم بفەوتێت و هاتم بەشداریم لە هەڵبژاردن کرد و دەنگم دا، بۆ ئەوەی خەڵکی ئێمەی ئێزدی و کورد سەربکەون.