یونامی: بەچڕی چاودێریی هەڵبژاردنی عێراق دەکەین

ئاڤا نیوز

محەممەد ئەلحەسان، نێردەی نەتەوە یەکگرتووەکان بۆ عێراق بۆ ئاڤا میدیا دووپاتی کردەوە، بە چڕی چاودێریی پرۆسەی هەڵبژاردنی پەرلەمانی عێراق دەکەن و دەڵێت، ئەمە هەنگاوێکی گرنگە بۆ پتەوکردنی دیموکراسیەت.

چیرۆکی سەرەکی: ڕۆژی 9ـی ئەم مانگە، پرۆسەی دەنگدانی تایبەت بەڕێوەچوو و ڕۆژی 11ـی هەمان مانگ، دەنگدانی گشتی بەڕێوەدەچێت، کە نزیکەی 20 ملیۆن هاووڵاتیی مافی دەنگدانیان هەیە.

لێدوانی فەرمی: محەممەد ئەلحەسان، نوێنەری تایبەتی سکرتێری گشتیی نەتەوە یەکگرتووەکان لە عێراق و سەرۆکی نێردەی یونامی بە ئاڤای ڕاگەیاند: "یونامی بە هاوکاری لەگەڵ حکومەتی عێراق کاردەکات بۆ پاڵپشتیکردنی لایەنە تەکنیکی و لۆجستییەکانی پرۆسەی هەڵبژاردن، ڕاوێژکاری تەکنیکی پێشکەشکردووە و بەشداری کردووە لە بەهێزکردنی پاکی و شەفافیەت بۆ دەستەبەرکردنی هەڵبژاردنی گشتگیر و کێبڕکێکار کە ڕەنگدانەوەی ئیرادەی ڕاستەقینەی دەنگدەران بێت".

داواکاری فەرمی: ئەلحەسان داوای لە هەموو لایەنە سیاسییەکان کرد "گیانی بەرپرسیارێتی نیشتمانی نیشان بدەن و ڕێز لە یاسا بگرن و دوور بکەونەوە لە وتار یان کردەوەیەکی هاندان دژی یەکتری کە ڕەنگە کاریگەریی لەسەر ڕەوتی هەڵبژاردن یان ئاسایشی دەنگدەران هەبێت".

زانیاریی زیاتر: "نەتەوە یەکگرتووەکان وەک هاوبەشێکی پاڵپشت و پشتیوانێک دەمێنێتەوە بۆ هەموو هەوڵێکی نیشتمانی لەپێناو چەسپاندنی دیموکراسی و بونیادنانی دامەزراوەی بەهێز کە خزمەت بە هاووڵاتی عێراقی بکات". سەرۆکی یونامی واشی وت.