سەرۆککۆماری عێراق: پشتیوانیی حکومەتی داهاتوو دەکەم بۆ ئەوەی پەیوەندییەکی دەستووریی لەگەڵ کوردستان بوونیاد بنێت

ئاڤا نیوز

 

سەرۆککۆماری عێراق داوا لە هاووڵاتیان دەکات چالاکانە بەشداریی هەڵبژاردنەکەی سبەی سێشەممە بکەن و نوێنەری خۆیان بۆ پەرلەمان هەڵبژێرن، جەختیش لە پشتیوانی کابینەی نوێی حکومەتی فیدڕاڵ دەکاتەوە بەجۆرێک بتوانێت پەیوەندییەکی دەستووریی لەسەر بنەمای هەماهەنگی لەگەڵ حکومەتی کوردستان بوونیاد بنێت.

 

وێنە گەورەکە: سبەی سێشەممە بەبەشداریی 20 ملیۆن و 63 هەزار و 773 دەنگدەر، هەڵبژاردن بۆ خولی شەشەمی پەرلەمانی عێراق بەڕێوەچێت، هەڵبژاردنەکە دوای 37 ڕۆژ لە بانگەشەیەکی گەرمی لایەنەکان بەڕێوەدەچێت، لەناو سێ پێکهاتەکەشدا 11 لیست و هاوپەیمانی کێبرکێی لەسەر بەدەستهێنانی زۆرترین کورسی دەکەن.

 

لێدوانی فەرمی: لەتیف ڕەشید، سەرۆککۆماری عێراق ئەمڕۆ دووشەممە پەیامێکی ڤیدیۆیی ئاڕاستەی گەلی عێراق کرد و تیایدا ئاماژەی بەوەشكرد، لە هەڵبژاردنەکانی دوو دەیەی ڕابردوو گەلی عێراق نموونەیەکی دیموکراسی نیشاندانەوە و پابەندی ژیانێکی سیاسی دەستووریی پێشکەوتوو بووە، بەشداریی کاراش لەم هەڵبژاردنە تاکە ڕێگایە بۆ ڕاستکردنەوەی هەڵەکان و چارەسەری لایەنە نەرێنییەکان، هەروەها تاکە ڕێگایە بۆ ڕێگریی لە سەرهەڵدانی دیکتاتۆریەت و تاکڕەوی لە دەسەڵاتدا.

 

ئەوەشی خستەڕوو، پشتیوانیی پەرلەمان و کابینەی حکومەتی داهاتوو دەبێت بۆ پەسەندکردنی یاسا گرنگەکان و بەدیهێنانی دادپەروەری کۆمەڵایەتیی، ئابووری گەشەسەندوو و کار و خزمەتگوزارییەکان، هەروها پشتیوانی لە کابینەی حکومەتی داهاتوو دەکات بەجۆرێک بتوانێت پەیوەندییەکی جێگیر و دەستووریی لەسەر بنەمای هەمانگی لەگەڵ حکومەتی هەرێمی کوردستان بوونیاد بنێت.